2018 Australian Open Ah Roger Federer Nih Pakhatnak Laksawng A Pom Than

Federer

Switzerland in Roger Federer, kum 36 nih 2018 Australian Open, Tennis zuamnak ah pakhatnak laksawngpi cu a co than cang.

Semi-final ah vawlei cung minthang Zverev, Dimitrov le Djokovic pathum bak a teitu South Korea in Hyeon Chung, kum 21 he Federer cu an i tong i H.Chung nih voihnihnak a dih hlanah a ke a fah caah a chuahtaak i Final a kai.

Grand Final ah Federer cu Mrin Cilic he an kai i Federer nih  6-2, 6-7, 6-3, 3-6, 6-1 in a tei i 2018 Australian Open champion ah a cang than.

Federer hi Australian Open lawngah tu kum he cun voi 6 bak pakhatnak laksawng a co cang. Atu tiangah pakhatnak laksawng a hmuh hi voi 20 a si cang. Pakhatnak si loin adangdang laksawng a hmuhmi hi voi 90 leng a si cang.

Australia, Melbourne ah Federer cu tennis zuam dingin a rak phak tikah, kum 36 a simi keimah nihhin minthang bik (pakhatnak hmu ding) ka si awk a si ti lo tiah a chim.

Asinain, Australian Open ah kan hnu kum he, tu kum he pakhatnak laksawng cotu (champion) a vun si than tikah a lunglawmh tukah a mitthli cu kurhkurh in a tla thluahmah.

Kan hnu kum ah rak tuahmi Wimbledon final zong ah Federer le Cilic hi an rak i tong bal cang i Federer nih a rak tei thiamthiam i Cilic cu a mitthli he a rak i chiah bal cang.

Switzerland’s Roger Federer (L) and Croatia’s Marin Cilic

Tu kum Australian Open zong ah Cilic cu a lungkil in a mitthli a tla than. Federer nih pakhatnak laksawng $4 million cu a inn ah a tinpi diam cang ko.

Nu single zuamnak ah vawlei cungah pakhatnak a simi Simona Halep le pahnihnak a simi Caroline Wozniacki cu final an kai i Caroline nih a tei ve. Halep cu a mithmai a panh kho hrimhrim lo. Lungnuam lo ngai in a ram ah a kir.

Ref: 7News, The Australian