Amnesty International: Myanmar Ralkap Nih Rakhine Chung Khua Pawl An Duah

Rohingya

US Secretary of State Rex Tillerson nih Rohingya muslim pawl tukdohnak hi ‘cohlan awk a tha bak lomi thil’ a si tiah faak ngai in chimrelnak a tuah.

Cun, Amnesty International zong nih Cawn Ningani ahkhan Myanmar ralkap pawl nih khua pawl an duahnak tehte kan ngei tiah an phuan cang tikah Myanmar cozah cung mawhchiatnak cu a tam chin lengmang cang.

Rakhine ramkulh in Bangladesh ah harsa ngai in a zaammi Rohingya milu cu an tam chin lengmang i 389,000 an si cang tikah Myanmar cungah vawlei pumpi i mawhchiatnak cu a faak chin cang.

Suimilam 24 chungah ralzaam milu cu 10,000 bakin an karh, cu tikah a zaammi Rohingya pawl hi an tam chin thuahmah lai i ‘thil har taktak’ a cang te lai tiin UN nih ralrin peknak an tuah.

 “Aung San Suu Kyi le a riantuannak hi kan tanpi a hau, asinain atu lio an cawlcanghnak hi cohlan awk a tha lomi a si caah Myanmar cozah he ralkap lei pehtlaihnak kong ah fiang/tliang tein kan um cu a hau cang”.

“Hi buaibainak hi donghter hrimhrim a hau. Atu bantukin hremnak an tuahmi hi ngol a herh. Miphun tenau cihmihnak a si tiah tampi nih an langhter cang, hi thil hi an ngol hrimhrim a herh”, tiah Tillerson nih a chim.

Amnesty International nih a liamcia zarh thum chungah Myanmar ralkap nih Rohingya muslim pawl dawithawlnak caah an innlo hna an duahmi hmanthlak hna cu satellite in an thlah.

Amnesty International nih cun khua an duahmi pawl cu satellite in an thlak i tehte tha tein an ngeih hnuah atu bantukin Myanmar ralkap nih Rohingya pawl umnak innlo an duah tiah an phuan hi a si.

Ref: AFP