Australia Ah Motor Pahnak In Pu Joseph Lian Hrin A Nunnak Liam

Pu Joseph

Australia ram, Nitlaklei Melbourne ah khua a sami Pu Joseph Lian Hrin cu nihin zinglei sml 7: 00 hrawngah ah thilri cawinak motor (crane) nih a pah i a nunnak liam tiah theih a si.

Pu Joseph Lian Hrin le a riantuan hawi (Falam pa) he tu zingka ah motor pakhat in rianttuan an kalti. An motor (truck fate) cun dum tuahnak thilri pawl an phorh pah.

An phorhmi thil cu lampi ah a tla sual lai tiah remhser dingin lamkam (emergency lane) ah an dir. An pahnih in an tum i thil cu fek deuh in an teem.

Cu hnuah, a hawipa cu motor cungah a kai tthan cang. Pu Joseph Lian Hrin bal cu tlawmpal te a hnu deuh vak.

Motor cung kai a hun i timh lioah thilri cawinak motor nganpi (crane) nih an hnulei in a hun pah hna.

Pu Joseph a pahtu motor (crane)

Pu Joseph Lian Hrin cu a hmun ah a nunnak liam colh. Zeiti aa khawn cu theih a si rih lo. Atu bantukin vanchiatnak a tonnak hmun cu Western Ring Road, Freeway lampi, Furlong Road, Deer Park pawngah a si.

Amah hi Laitlang lei Thantlang Farrawn khuami a si i Melbourne Chin Church (MCC) khrihfabu chungtel a si. Cun, Pu Joseph Lian Hrin hi chungkhar dawtu, bochan ngaingai mi a si.

Pu Joseph Lian Hrin & A Nupi

Australia a rak phak hlan ahhin Malaysia ah CCF Secretary zong a rak tuan bal mi a si. Taantaakmi a nupi, innchungkhar, rualchan cingla, hawikom le a khrihfa bu cungah ngaihchiatnak kan rak hrawmpi ve hna.

Ref: MCC & 7 News