Australia Ram Sihni Pawl Nih Aung San Suu Kyi Tazacuai An Timhmi Hnon A Si Than

Aung San Suu Kyi & Turnbull

Myanmar State Counsellor le Foreign Minister a simi Aung San Suu Kyi cu Rohingya pawl kong he pehtlai in Australia ram sihni cheukhat nih Melbourne Pengkulh Biaceih Zung ah tazacuainak ca an tial.

Atu lio ah Australia, Sydney ah tuahmi ASEAN Summit ah a rak phanmi Myanmar ram aiawh Aung San Suu Kyi cu sihni hna nih “Rohingya pawl cungah minung ruahnak a ngei lo, minung bantukin a zohkhenh hna lo” tiin tazacuai an timh hi an si.

Asinain, hi Aung San Suu Kyi tazacuai timhnak cu Australia cozah sihni lutlai (Attorney General) Christian Porter nih a hnonpiak than hna.

Aung San Suu Kyi cu Zarhteni ahkhan Sydney ah a phan i Christian Porter nih cun Aung San Suu Kyi cu ramleng vuanci, le cozah lutlai pakhat a si bantukin tazacuai le tlaih le khih khawh a si lo tiah a chim.

 “International law, tazacuainak phunglam tangah Aung San Suu Kyi cu cozah lutlai, ramleng vuanci an si bantukin Australia ah tlaih khawh le tazacuai khawh a si lo”, tiah Christian Porter nih cun a chim.

Sihni pawl nih tazacuainak an tialmi ah cun “Suu Kyi nih Myanmar in Rohingya pawl an zaam lonak dingah a dirhmun in a nawlngeihnak a hmang lo”, ti an telh chih.

Australia ram hi ASEAN chungah aa telmi ram a si lo nain tu kum ASEAN Summit cu Australia nih inntek a tuan, zeicahtiah Asia ram chungah ramkhel kong le chawlehnak lei pehtlaihnak tha deuh in ser a duh caah a si.

Aung San Suu Kyi nih Zarhpini conference ah Rakhine kong cu saupi fiang ngai in a chim i Asia chung ram innpa hna sinah bawmh halnak zong a tuah tiah Australian Prime Minister Turnbull nih a chim.

Zarhteni ahkhan Sydney Hyde Park ah minung 100 hrawng cu an pumkhawm hna i “Aung San Suu Kyi, na ningzak seh!”, tiah Aung San Suu Kyi an auhnawh.

UN thanh ning ahcun kan hnu kum August 25 lio tukdohnak in Bangladesh ah a zaammi Rohingya hi minung 700,000 deng an si ti a si. Cun, Myanmar ralkap hna cung zong ah sualphawtnak a phunphun an tuah.

Asinain, Myanmar nih cun zei sualnak hmanh kan tuah lo tiin alnak an tuah chih ve i ralkap/palik nih an tuahmi sualnak cu “tehte” langhter dingin an lehrulh hna.

“Oct 2016 he, August 2017 lio he buainak a chuahpitu cu Arakan Rohingya Salvation Army (ARSA) an si ko. Hi vialte hi ARSA ruangah a si. Cozah nih zeihmanh kan tuah lo”, tiah Aung San Suu Kyi zung lei chimrel khotu Zaw Htay nih a chim.

Ref: Reuters