Bangladesh In Rohingya Pawl An Kir Than Kho Cang Ko :Myanmar

Rohingya

Cawn Nikhatni ahkhan Bangladesh ah a zaammi Rohingya ralzaam pawl laak than ding hi i hmaithlak bikmi a si ko tiah Myanmar nih UN ah an chim cang, asinain Rakhine ramkulh chung ah daihnak le rualremnak a um nakhnga rian tampi tuan a herh tiah an chim chih.

Bangladesh le Myanmar hna ram hnih cu Bangladesh ah aa dormi Rohingya ralzaam pawl Myanmar kirter thannak kong ah tawlreltu ding riantuannak phu ser dingin hnatlaknak an ngei cang tiah Bangladesh ramleng vuanci sinin theih a si.

Union Minister le Social Welfare, Relief and Resettlement i minister zong a simi Win Myat Aye nih UNHCR Executive Committee tonnak ah Rohingya ralzaam pawl tlunter thannak kong cu a chim.

 “Kan i hmaithlakmi cu atu lioah Bangladesh ah a zaammi ralzaam pawl hi ram (Myanmar) chungah kirter than hna ding hi a si ko”.

“Hi ralzaam kirter thannak cu Myanmar ram kir a duhmi hna caah cun zeitik caan poah ah thawk khawh a si ko lai. Ralzaam sinak fehternak/cohlannak cu 1993 Myanmar le Bangladesh karlak hnatlaknak ning in tuah le zulh a si lai”

 “Bangladesh nih ralzaam ah an fehter cangmi hna cu zeihmanh poipang um lo tein Myanmar ah cohlan an si ko lai, cun limhang ngei tein kirter an si ko lai, an humhimnak zong amahkhaan piak an si ko”, tiah Geneva UN tonnnak ah Win Myat Aye nih a chim.

Win Myat Aye nih cun Aug 25 i palik sakhaan hmun 30 ah tukdohnak a tuahtu ralhrang phu (ARSA) cu sualphawtnak a tuah hna.

“Rakhine ramkulh chung humhimnak lei ah cun a tha deuh ngaingai cang ko, Sept 5 in tukdohnak zeihmanh cu a um ti lo, asinain daihnak le rualremnak fek a um nakhnga tampi i zuam a herh rih.”

“Thleidan asiloah tanh hlei ngeih in bawmhnak i pek ti bantuk asiloah thawngzamhnak lei i tanpi deuhnak a um ahcun phu dang (miphun dang) caah buaibainak a chuak chin lai”, tiah Win Myat Aye nih cun a chim fawn.

Ref: Reuters