Bangladesh Le Thailand Ah UN Lamkal Yanghee Lee A Tlawng Lai

UN

Myanmar chung minung covo dirhmun ngiathlaitu dingah khanhmi UN Special Lamkal (Aiawhtu) Yanghee Lee cu Myanmar cozah nih amah he riantuanti ti lo dingin an hnon cang ko nain Jan 18 in Bangladesh le Thailand ah a rian tlamtlinter dingin a tlawng lai tiah theih a si.

 “Ka si khawh chungin, UN nih rian an ka pek bantukin Myanmar chung minung covo buarnak le hremnak in a ingtuarmi bawmhnak rian hi pehzulh dingin lungsehnak ka ngei”.

 “Myanmar ah luhnak nawl pek ka si lo ruangah le keimah he riantuanti an duh ti lo ruangah ka rian hi a har deuh ngaingai, asinain Myanmar innpa ram, ramleng ah a zaammi hna tlawnnak le hmuhtonnak in minung covo buarnak kong ah thil sining hmuhfiannak ngah kaa zuam lai”, tiah Yanghee Lee nih a chim.

Yanghee Lee cu Bangladesh ah Jan 18-24 tiang a tlawng lai i cu hnuah Thailand ah Jan 30 tiang a caam lai.

Bangladesh a um chungah Yanghee Lee cu Dhaka le ralzaam dornak camp pawl ah a tlawng lai i ralzaam pawl le zatlang bu hruaitu hna he tonnak a ngei lai. Thailand ahcun Bangkok, Mae Sot le Chiang Mai ah a tlawng lai.

 “Myanmar cozah nih mi theihdanh in rian a tuan, tanh hlei a ngei tiah sual an ka phawt. Cun, Myanmar ah minung covo buarnak a um lo tiah alnak an tuah fawn. Nawlngeitu hna hi an dirhmun an i ruah than ding le a ingtuarmi hna hi a biapi deuh in an chiah hna dingin ka hal hna lai”

“Hi a ingtuarmi hna aiawh in biachim ding tuanvo ka ngei, hi kong ah phih le kham ka si lai lo. Cucaah, thil sining le an hmuhtonmi pawl hmuhtheih dingah innpa ram ahhin ka tlawn ding hi a si”, tiah Yanghee Lee nih a chim.

Ref: Mizzima