Bawipa Hmai Le Chin Miphun Vialte Hmaiah Ngaihthiam Hal Le Lungum Lawmhnak Biachim Ka Duh: Za Lian Sang

Chin Miphun

A hleice in Bawipa hmai le Chin miphun vialte hmaiah ngaihthiam hal le ka lungum lawmhnak bia chim ka duh. Cun, keimah ruang i lungfak le ngaihchia mi vialte Khrih Jesuh min in ka ngaithiam hram ko ulaw tiah zaangfah kan nawl hna i pumpak in a ka dawtu le thlacampiaktu ka hawile vialte nan cungah tampi kaa lawm i Bawipa tu nih a letza in thluachuah in pe ko hna seh mu.

Cun, aho nan si ah Jesuh min in kan ngaihthiam dih ve hna. A liamcia 2/9/2015 i Malaysia Chin Refugee Committee (CRC) nih thong an rak thlakmi Salai Za Lian Sang ka si.

Atu cu Bawipa thawngin 22/12/2016 ah Bukit Jalil Camp in Kawlram ah ka tlung. Asinain, vawlei a si caah thonginn in ka chuak nain ka nunnak ah hnangamnak ka hmu hlei lo. Asinain Bawipa cu ka caah khamhtu a si kha ka theih i. cuti cun Bawipa bochan in beidong lo te’n riantuan hram cu ka thawk than. Sihmanhsehlaw, ka riantuanti hawi le tihzah tlak a simi upa hna nih ka tuanbia hlun zoh in bia an chim tawn tikah tahhramnak in caan ka hman hi a tlawm ti lo.

A lam kip in pheutu le dodaltu cu atu tiang zongah ka ton cuahmah liopi a si ko. Nain, vuivai lo te’n minungfa velo bang taptap ni’ni in miphun caah pumpek riantuan hram cu ka thawk than. Bawipa bochan in riantuantu si cu mi thluachuah a si timi lungput in keimah le keimah ruahchannak kaa pe. Cucaah, ka tuanbia hlun ruangah beidong le lungrawk in ka um awk si lo tiah keimah le keimah cu ruahchannak kaa pe than i a hlei in miphun dawt timi cu a cawn in cawn a haumi le mah i zuamnak hi abiapi ngaimi miphun caah a hramthawk riantuannak cu pumpek hi a si tiah thazaang thar ka lak than.

A ruang cu phung ñing loin UNHCR Card deu a tuah i miphun a leirawi tiah Chin Refugee Committee nih thong thlakmi ka si hleiah anmah ruahnak le nawlpeknak in thawngzamhnak (media) kip nih ka konglam cu Saramfa bangin le minungfa velo bangin an rak sawksaam dih tikah cun ka nung nain ka hnawng an ka tan a si tiah ka ruah ko.

US, Australia, Norway, Canada, le ram dangdang um Chin miphun vialte biacah kan duh ko hna. Kan miphun kongah nan chimrel ngam i kan Chin miphun thanchonak nan duh taktak ahcun; (1) kan Chinland ah rak tlung ulaw, a lamkip in kan miphun thanchonak caah riantuan dingah Chinland nih an hngah ko hna. (2) ‘kan miphun thanchonak caah cun’ timi lungput ngei ulaw. nan umnak ram cio i a thudirmi kan Chin miphun hawikhat he lungrual in thutdir khawh i zuam hna ulaw, fellowship kip le meeting kip i bia nan chimnak ah ka minung hawi caah lungfahnak a chuahpi sual lai maw timi ruat bu ten biachim i zuam usih.

A hleice in mah miphun hawikhat he hrimhrim tazacuai ti bantuk nunphung ziaza dawh lo vialte le hnahchuah neknaihnak lungput hrimhrim hrial khawh i zuam hram hna usih. Kan miphun thanchonak caah a dawnkhantu thil cu; Mah le mah tazacuai ti bantuk le mah le mah i thah, mah le mah i dodalnak nih kan miphun thanchonak a dawnh.

Atu nihin kan miphun thanchonak caah nawlbia pa (10 ) hi kan i tlaih a hau, kan fimthiamnak le kan thazaang le chawva nih daihnak a chuahpi kho lai lo. Bawipa dah tilo cun kan miphun ramkhel biaruahnak zong hi zeihmanh a si lai lo. “True leader works for peace” an ti bangin dinfelnak in hruaitu asimi hna i riantuannak nih daihnak a chuahpi.

Nihin Malaysia um Chin miphun boruak cu ruah ah lungfaak le ngaihchia khi a si. Ralzaam velo bang Chin community riantuantu hna le UN Zung i holhlettu pumpak cio kan tuahser mi le thlaici tuhmi cu Malaysia um Chin miphun vialte nih mithmuh kuttawngh in an zuun cuahmah liopi a si. Malaysia um Chin miphun kan boruak hi Malaysia um Chin miphun lila nih kan phihkharmi a si caah nihin kan boruak nih a herh mi cu Chin communities riantuannak le UNHCR interpreter hna i nan cawlcanghnak ah ruahchannak kawl in kan Chin miphun tampi an um timi ruat bu te’n miphun dawtnak lungput he khua rak khaang peng rih ko uh tiah zaangfah nawl kan duh ko hna.

Malaysia um Chin miphun vialte chungin ralzaam card a ngei lomi vialte le card a ngei ko nain chuh a tongmi vialte zeitluk in dah an lungfah i nan ngaih a chiat hnga mu…timi khua ka ruah ahhin a faak tuk ee. Asinain, theih ding mi cu UNHCR hi Malaysia cozah nih a dirhmi a si lo ram khat/hnih men nih  dirhmi a si fawn lo i vawlei cung ram tampi fonh in dirhmi community a si caah beidong lo ten nan i timhmi hmunhma nan phak tiang i hne hram ulaw, nan caah ruahchannak lam cu nan hmuh khawh ko lai ti ka zumh. Vawlei cung minung vialte kan um chung cu UNHCR riantuannak hi a dong taktak lai lo dahkaw.

A donghnak ah a liamcia 2015 CRC riantuantu hlun vialte nan tuahsernak cungah kaa lawm tiah chim than ka duh ko. A hleice in thong nan ka thlakmi cungah kaa lawm i a ka khamhtu Bawipa he tonnak caan tha nan ka serpiak hi ka caah cun a sunglawi bikmi Vailam a si. Bawipa nih thluachuah in pe hram ko hna seh, pumpak cio nan cungah.

By Salai Za Lian Sang (Hakalay)