BIA (Kan lei le hmur ralrin thiamlo ahcun Bia ruangah)

Bia

BIA (Kan lei le hmur ralrin thiamlo ahcun Bia ruangah)

Pathian nih van le vawlei pin ah zeizongte a serlio ahhin Bia hmangin a serdih, ti asi. “Van le vawlei cu rawk hmanhsehlaw ka Bia cu a rawk lailo” ti ah Pathian nih ati. Hinih a fiantermi cu Bia nih hmual a ngeihnak le a biapitnak hna hi ansi dihko. Laiholh ah a ummi “Pasal ka biachim le ka tlah ttem “timi lila khi Bia a biapit zia ansi. Bia hi meithal kuan le feizum tluk in hmual a ngei.

Vawlei cung ramkhat le ramkhat, hruaitu le hruaitu kan i doh le khuaci kan muihnak hna hi Bia ruangah asi. Bia kaakhat chimpalh le chimhraam ruangah buailo ah kan buai, thah tlaklo ah kan i that. Bia kan i al hna. Miphun dawt le ttanh ruang ah tampi asi veko nain, kan duhlo, kan pomlo zawngin bia fak le bia nengsei, nautatnak bia chim ruangah Kawl ralkap le tlangcung hriamtlai pawl i tukdoh lengmangmi le remdaihnak tuah a herhnak hi a rak si ko. Innchungkhar dirh dingin ai halmi zeimawzat an tlam a tlin tawnlonak zong nulei maw, pa lei maw Bia kaakhat te chimthiamlo le chimsual ruangah asi tawn. Zeipipa ngai ahhin asi tuk lem ballo. Khuasual tuah ruangah bia lamkal i thlah in remnak khua a khaangmi hna an i remtthat khawh tawnlomi zong Bia ruangah asi. Khatlei nih bia hi a tungin an chim ahcun, khatlei tal nih chimphei in chim ve awk asi nain, ‘mah‘ i ti veve ruangah kan khua khan duhmi hlawh a tling kho tawnlo.

Khrihfabu kan i tthen lengluangmi zong hi zeidang dang cu a umko lai nain, biapi bik cu Biachim thiamlo, biangaih thiamlo ruangah asi deuh zungzal. Innpa chakthlang kan i dawtkhawh lonak zong hi dawtnak, siaherhnak bia le hla i chimhruah loin innri lori Area kongkau ah biafak deuh tu luandeuh le perhdeuh in kan i chimhnawh ruangah asi bik.
Bia ruangah ai dawmi kan tamrup in biachim thiamlo, biahleihluat chim ruang i ai hua ai ralmi hi kan tam ve. Bia hi naam haar cung i a luangmi khuaitizu bantuk asi. Dawtnak tluk in huatnak le fahnak a chuahpi tuk ve tawn. Bia hi chimtung a um i, chimphei a um ve. Ka lung a thiang ai pat tiah chimphei kha chimtung i chimlen ko ahcun lunglawmhnak si loin lungfahnak le biahri i tirh, taza i cuainak tiang a chuak.

Biachim hi a fawituk tluk in ngaihchihnak zeihuaha lo ah a chuahpi tawntu a rak si ve. Bia hi tluangtlam ngaiin ka chim kanti ko zongah thinlung hmape a ngeimi ca ahcun hliamhma a porter tawn. Chimtu le ngaitu karlak a damlo ahcun biachim hi hawi i ser le ral i sernak ramri ah a um. Minung hi bia le hla chungah kan um. Biadawh le biathlum ngaih kanduh dih. Culio ah kan i ruahloning tuk in bia kan theih tik ah saram tluk in a hraang khomi kansi. Tuufa bantuk in kan nem kho fawn.

“Bia kaakhat nih vanni za kuai” ti a um kha. Cucaah bia kan chimtik ahhin hnuhmai ruat, tuak ciahmah tein chim usih. Hi ka chim dingmi bia nihhin midang lungthin fahnak pe sual lai maw? ti kha philhlo a hau.

 

Bia