Chin Ralzaam Hna Kong Ah APRRN Nih UNHCR Sinah Nawlnak A Tuah

Chin ralzaam

Asia Pacific Ralzaam Covo Dirkamhtu Bu nih Chin ralzaam hna kong ah biathlehnak cu let than chung dingin UNHCR sinah nawlnak a tuah cang tiah theih a si.

A liamcia June thla chungah khan UNHCR nih Chin ralzaam hna cu Dec 31, 2019 hnu cun ralzaam ah cohlan ti lo ding le UNHCR kilvennak pek hna ti lo dingin biathlehnak an rak tuah.

Asia Pacific Refugee Rights Network (APRRN) nih cun Malaysia um Chin ralzaam 30,140 le India um Chin ralzaam 3,000 hna i an ralzaam sinak chuh/laakpiak than ding timi UNHCR biathlehnak kong ah an lungtlin lonak le an siarem lonak an langhter.

“Atu bantukin hi biathlehnak (asiloah policy) hi zulh le tuah taktak a si ahcun ningcang lo ngai in mi tampi cu an ralzaam sinak chuh an si lai i an nun a him lonak hmun, an ram ah kirter khi an si hnga”, tiah Cawn Nihnihni ahkhan APRRN nih cathanh chungah an tial.

“NLD cozah nih Myanmar ram chung daihnak sernak ah zeimawzat karhlannak a ngei cang ko nain thlennak tling taktak cu ram chung miphun tenau pawl caah a chuahpi kho rih lo.”

“Myanmar chung hmun cheukhat ah thanchonak a um len cang ko nain a bik in miphun le biaknak lei in mi tlawm deuh a simi hna caah an zapi tein ralzaam sinak chuh khawh awk ding tiang a hrampi taktak thlennak a um rih lo”, tiah cathanh ah an tial chih.

Cun, APRRN nih cun UNHCR ralzaam card chuh an si lo nakhnga, Chin ralzaam hna le adang ralzaam vialte zong anmah duh loin an ram ah hramhram in tlunter an si lo nakhnga, le ralzaam hna an i dornak ram hna le Myanmar he himte le limhang ngei tein tlunter an si nakhnga Chin ramkulh ah biatak tein riantuannak an ngeih nakhnga ti bantuk pawl zong UNHCR sinah halnak a tuah.

UNHCR nih an rak chimmi cu Chin ralzaam hna cu Chin ramkulh a dai i a him cang ko caah huhphenhnak an herh ti lo ti hi a si.

Chin ralzaam hna hi Malaysia ah a pahnihnak a tambik phu an si i June 13 ahkhah UNHCR nih August thawk cun an ralzaam sinak chuh hram thawk a sic ang lai tiah an rak chimh hna.

Cucaah, August thawk khan UN zung ah a kalmi Chin ralzaam hna cu interview zong tuah hna loin December 2019 tiang lawng nung dingin an card an tuahpiak hna. Jan 1, 2020 cu Chin ralzaam pawl an card pawl zohpiak a si ti lai lo i an ralzaam sinak zong a dih lai.

#Asia Pacific Refugee Rights Network (APRRN) hi vawlei cung ram 28 in NGOs/Civil Societies bu 340 leng i funkopnak bu a si i Asia Pacific chung ralzaam covo dirkamhtu bu a si.#

Ref: The Star