Chin Ramkulh Cozah Nih Laitili Tidil An Tuahmi Le National Park Tuah Ding Kong Ah Chuncung Khuami An Lungtling Lo

Chuncung Khuami

Chin Ramkulh cozah nih Zinghmuh Tlang National Park tuah dingin a timhtuahmi hi Hakha peng, Falam peng, le Thantlang peng pathum ram chungah a ummi a si. Hakha peng, Chuncung ram chung acre 7756, Falam peng chung acre 6809 le Thantlang peng chung acre 5372 aa tel. Chuncung nih an ham i an sian lomi hi Chuncung ram chung acre 7756 hi a si.

Chin Ramkulh cozah zungbawi pawl cu 19.8.2017 ah Chuncung ah an phan i National Park tuah dingin Chuncung ram cu an hal hna. Khua mipi nih an nunnak hrampi a si caah an siang lo.

Chuncung khuami hna nih an ram an sian lonak a ruang cu a tanglei bantukin an tial;

  1. 1890 hlan in kan pupa hna nih an rak thlawhmi ram, an nunnak hrampi a si lengah, nihin tiang in a kan cawmtu, kan ram a si. Rak thlawhmi lopil pil riat aa tel.
  2. Inn zuat satil – caw, naa, sia, rang, kan chiahnak hmunhma a si.(Satil zuat hi kan pawcawmnak pakhat a si caah an tlonnak ding hmunhma hi a biapi tuk)
  3. Chin Ramkulh cozah nih an kan lakpiak a si ahcun innzuat satil chiahnak hmunhma a um lai lo. Kan cinthlakmi thlairawl vialte, kan satil zuatmi nih an ei dih lai i Chuncung khuami kan pawcawmnak tiang in a hnorsuan lai.
  4. Kan i dornak caah kan inn kan lo, thingrua kan laknak hmunhma a si.
  5. Kum tin tein Lungpang khuaihliti zong kan laknak hmunhma a si.
  6. Kan pupa hna chan ah Zinghmuh Tlang hi kum hnih dan ah vok in an rak biak i, kum thum dan ah Sia in an rak biak mi a si i, tuanbia a ngei mi, rak sunhsak tukmi a si.

Hi hna ruang ahhin Chuncung khuami hna nih National Park tuahnak caah ram an sian lonak cu a si. Cucaah, Chuncung khuami hna nih 18.9.2017 ah ram an sian lonak kong le National Park tuah an duhlonak kong ca an tial i inn 300 leng nih minsen an thut hnuah Chin Ramkulh Cozah zung pawl ah an ap.

Cu hnuah Chin Ramkulh cozah lutlai pawl cu 27.5.2018 ah Chuncung ah an phan than i khua mipi he National Park tuahnak kongah tonnak an ngei than. Chuncung khuami hna nih National Park tuah an duhlonak le kan lungtlin lonak kong cu tampi chim a rak si. Cu hnu zong ah, a voihnihnak duhlonak ca an tial than, Inn 322 nih duhlonak minsen an thut i Myanmar President zung ah an kuat.

Hi tluk in Chuncung mipi nih an duhlonak an langhter lengmang ko bu ah, Chin Ramkulh cozah nih khuabawi theihternak zong tuah loin, Chuncung ram, an sunhsakmi, tuanbia a ngei mi, pangpar phun tampi a parnak, thaal caan ah Youth Camp tuahnak, Crusade, Camping, an tuahnak hmun “Laitili” cu hrawh hram an thawk i, zohdawh tidil ah tuah le kham an timh.

Atu bantukin Chin cozah nih riantuan hram an thawk ti thawng an theih in Chuncung khua min in “Nan riantuan mi hi ra kan ngolpiak uh” tiah Chin Cozah sinah ca an tial. Cu cakuat cu zei ah relpiak lo in pehzulh in rian an tuan thiamthiam. Cucaah, 4 September 2018 ah Chuncung khuami 180 leng nih an riantuantu hna cu, “Nan riantuanmi hi ra kan ngolpiak uh” tiah nem tein an ti hna.

Zeicahtiah, mipi duhnak tel loin Chin cozah nih an tuanter hna mi a si. Rian a tuanmi hna zong nih an rian cu an ngol i an tlung ve. Cucaah, Chin cozah nih a rak thlahmi hna zungbawi hna le palik pawl zong Laiva dam pawng tiang meithal, zenkuan, le hriamnam he an rak kai hna.

“Chuncung khua upa hruaitu ton kan in duh hna” an ti caah Chuncung i Hall ah tonnak an ngei than. Cu lio zong ahcun National Park tuah an duhlonak le Laitili an dilmi an duhlonak kong tampi cu Chuncung khuami nih an chimh hna.

9 September 2018 ah Chin cozah nih Chuncung khuabawi le upa hna cu an auh hna i “kan riantuan mi hi pehzulh in rak kan tuahter uh”, tiah an ti hna. Khuabawi le khua upa hna nih “Khuapi nih an duh lomi cu tuannak nawl kan in pe kho hna lo” tiah an leh hna. Cu zaan ah cun Chuncung khuami vialte General Meeting an tuah i, khuami hna zong nih “Minute pakhat, second pakhat hmanh tuannak nawl kan pe than kho hna lo” tiah an chim cio. Mipi nih an duh lo, an lung a tling lo ti an theih ko bu ah, 10 September 2018 ah Security police minung 8 he an riantuan hma cu an hung domh/tuan than.

Chin cozah nih National Park tuah dingah an riantuan ning le an cawlcangh ning zoh tikah Democracy hruaining phung he aa kalh. Chuncung mipi nih hi tluk in duh lonak le lungtlin lonak an langhter, hmuraka zong in an chim len nain zei ah an kan relpiak lo, hramhram in tuah an timhmi hmuh tikah Chuncung mipi lung a fak, thinlung a kekkuai.

Hi ruang ahhin Chuncung khuami hna nih lungthul loin, lungtlin loak le an ram an sian lonak cu lamzawh in hmuhsaknak ngeih dingin timhtuahnak an ngei tiah theih a si.

Ref: Chuncung Family Network (CFN)

Credit: Pastor Mang Nawl Lin