Chin Ramkulh Khualipi Hakha Hnawm Tawlrelnak Ah Ruah Ding

Chin ramkulh khualipi Hakha ah, hnawm an tawlrel ning (waste management) lei ah ruah ding tam ngai a um. Ruah ning ti tikah, zeidang pi si loin an tuah ning hi khuapi caah a tha maw, zeital thanchoter ding a um maw timi asi ko.

Hakha ah Sipin nih zarh khat voi khat mawtaw in hnawm an thlet tiah theih asi nain, tu lio hrawng ah hin hnawm thle mawtaw cu zarh khat ah vawikhat a rat lo caan hi a tamtuk.

Mawtaw an rat caan hmanh ah hin, hnawm kan pek hna lai ti ah mawtaw zong an dir duh lo tiah min langhter lomi nih a chim.

Cun, hnawm an thletnak hmun ah hin, hnawm pawl cu an khang lo cun a khor zong an co lo — cu ruangah hnawm cu thli nih a choih caah pawngkom caah hnahnawhnak a pek hna tiah theih asi.

April 21 ah CCERR (Community Care for Emergency Care and Response) tawlrelnak in, FINO mino, Hakha Thar nubu le LRV (landslide response volunteer) pawl nih Hakha khuapi thlan hmun (Rual u) thlan ah hnawm an char. Cu Rual U thlan pawngah cun Sipin nih hnawm an hlonhnak a um, cu hnawm zong cu an khang lo (a caan-caan te lawng ah an khangh), cu ruangah Rual U thlan lei ah hnawm cu thli nih a rak choih. Cu tik ah Rual U thlan zong zoh aa dawh lo ngai, tiah theih asi.

Hnawm an khangh zongah tih nungmi hnawm le zeibantuk hnawm pawl zong an thlei dang lo tiah theih asi.  Cu ruangah tulio, Hakha khualipi ah hnawm an tawlrel ningcang hi ruah lo awk tha lo asi ko.