Chungkhar Vanram Ser Usih

Chungkhar Vanram Ser Usih
Happy young family walking on the beach

Chungkhar Vanram Ser Usih

Chungkhar Vanram Ser Usih

Tulio vawlei cung thawng le paang kan hmuh kan rel tik ah thawngpaang ttha a um tilo. Thawngchia lawngte. Cu thawngpaang chia chung ahhin chungkhar kehkuainak le nuleva ttangdang i pomtak, i phohpian taak kong hi tampi ai telve. Cu tik ah i thahnak, i tthennak, taza i cuainak, chungchuak fale ngakttah cannak nih a zulh. Hinih a langhtermi cu nihin vawlei cung khuasa innchung khar nun hi a dam tilo, ti a fiang. Pumpak kan damlo zong hi chungkhar damlonak nih a hrinmi an rak si dih ko. Biaknak dang khuasaknak lawng maw a damlo ti ahcun asi fawnlo, Khrihfa ram ko hi a zualfawn. Ziah! kan biakmi Pathian nih a kan cawnpiak mi asi ttunglo, hiti kansi? ti hi ruahlo awk a tthalo. Jesuh hmai hmuh ngam dawh kansi tilo. A cawnpiakmi hmanh zul loin cawnpiak lomi pipi kan tuah tawn hnga, tihi ruah zawn ah lung zong a fak, mithmai a bi. Biaknak dang sin ah Mission rian kan ttuan kan ti. Kanmah leikam kan dam fawnlo. Chungkhar cio dirhmun hlathlai tik ah 70% cu kan zaw dih. Kan zawtning belte phundang cio asi ko lai.

Crusade kanti, Camping kanti, voitam taktak kan tuah cang. Hihnu zong kan tuahrih lai. Cheukhat cu kumkhat ah voi tam lakte kan kai cang hna. Nain, cawnpiaktu an kal, Vaipa bang kanmah hmun lila ah kan laam peng fawn. Kan theihngaihmi Khrih thawngttha nih pumpak cio kannun hliahcaang a zunh kho in kan thlarau chung muru a hlankho taktak rualo. NGOs lei zongin an kan cawn piak. Fimnak, tthanchonak, ngandamnak, pawngkam kilvennak tbk cu ceilak te i cawnpiak le i bawmhchanh asi nain, chungkhar nuamh nak Hlei le chungkhar cio thinlung nunram damnak ding kong, nu le va kar i pehtlaihnak, fale he i pehtlaih le i tthithruainak kong hi kan chambau tuk rih. Hikong hi cawnpiaktu ttha kan ngei hnalo. Nu le va karlak ah thuk deuh in theih kan herh mi kong i cawnpiak dingah a ngaihuam dingmi an um huaha lailo. Zir kongcaih ah an ruah. Biate i kan ruahmi kongkau hi kan chambaunak bik le chungkhar kehkuainak a hrampi asi hi kan theilo. Nu le va awkaa thlum tein zingzan ai biachawnmi kan um tilo. Nuleva kar ah di i riamhnak le i tlaihchannak kan i pe kholo. Cucu nu le va karlak ah kan herhmi thil thuk deuh in lei kan rel, kan ngaih le kan suaphaulo ruangah asi. Pasal le nih mah um in um, nupi le nih cu tthiam. Vokte arte kong lawngah biapi ngaiin bia vai ruah nihhin nu le va kar ah thuukpi in tlaihchannak le i duhdawtnak a chuahpi kholo.
Vanram a nuamhning kong ai laarmi hna nih ca in an ttial, bia in an chim i kan theihpah. Vanram ahcun pakhat le pakhat i dawtnak bia phai le Pathian tufa thangtthat lawng hi rianpipa asi, anti. Cu nun cu hi vawlei kan nunchung ah rak langhter chungding hi Bawipa duhmi asi. Kan nunlio kan chungkhar hi vanram nun hluan dingin ser a herh taktak. Vanram ah chungkhar kan i pehtlaihding ning le dawtnak lawng kan rawlthaw bik asi dingning hi langhter chung ding hi kan rian asi. Cutin kan i nunpi chungthiam ahcun vawlei ah thawngpang chia hi theihding a um lem hngalo. Ngakttah cawmnak ah a ummi khi hlathna hmanh u! thih ttian a tuarmi nakin nunttian i a ttianmi chungkhar i a rami an tam deuh lai. Cucu chungkhar cio kan damlonak theipar an raksi. Ngaih a chia bak ko.

Cucaah nihin thawk in nu le va kan i pehtlaihning hi thuk deuh in ruah le dawtnak le i theihthiamnak, chun he zan he di i riamhpiak veve thiam le duhnak timi sining thar he nuncaan hmangcang hna usih. Nu le va i daw usih. Zir le hngaltaam ah kan ruahmi nupa sinak lei kong zong hi nuva karlak ah dawtnak fehtertu ansi hi thei in a tthatnak lei khel in nunpi le hmanzia thiam hna usih. Cuhnu lawngah nihin hi a buaitukmi vawlei buainak ah ai telmi chungkhar buainak hi a zordeuh hrimhrim lai. Chungkhar vanram kan ser lawng ah kanram a damlai.