CSP Kong Ah Australia Cozah Nih Cathanh Thar An Chuah Chapmi A Um Rih Lo

Community Support

Australia cozah nih an tuahmi tangka dih in chungkhat unau asiloah hawikom auhnak Community Support Program (CSP) kong ah acozah lei in tu kum November thla chungah a tawlreltu ding bu, Approved Proposing Organisation (APO) thimnak le thanhnak an tuah lai tiah theih a rak si nain atu tiangah cathanh thar chuah chapmi a um rih lo.

Department of Immigration and Border Protection lei in hi CSP kong ah tawlreltu ding APO fehternak cu an tuah rih lo caah atu tiang hi zeihmanh thawk khawh a si rih lonak a si tiah a liamcia kum ah hi bantuk kong tawlreltu bu Brotherhood of St. Lawrence in Program Coordinator Bahati Ferdinand nih a chim.

APO fehternak a um zawngin theihternak kan rak tuah colh lai. Cozah lei in thanhnak an tuah hlan chung poah cu zeihmanh tuah awk a tha rih lo tiah Bahati nih a chim chih.

CSP kong he pehtlai in thawng thar thanhmi theih a duhmi nih hi link in hin zoh le bih lengmang khawh a si. Cozah lei in hi kong he pehtlai in cathanh an chuahnak ding cu-https://www.border.gov.au/Trav/Refu/Offs/community-support-programme hin a si.

A tawinak in langhter ahcun, hi CSP hi 1 July 2017 khan Australia cozah nih an chuahpimi a si i ralzaam a simi poah nih sok khawh a si.

A tlangpi in sok tikah AUD2,680 a dih lai, cun cohlanmi si ahcun visa pek a si hlanah AUD16,444 liam chap a si lai i chungkhar ngeimi nih cun chungkhar chungtel pakhat caah AUD2,680 thluamah liam chih ding a si lai.

Cu lengah APO lei in siseh, adangdang lei in a dih ding he fonh ahcun a dihlak in AUD25,000 in 30,000 hrawng cu a dih lai. Cun, kum 18 in 50 karlak minung le riantuan kho dingmi pawl hi hmaithlak/papek deuh an si lai.

[Hi kong he pehtlai in thawngpang thar a um zawng in thanhnak kan rak tuah colh than lai]