DIRKAMH

Dirkamh

DIRKAMH

Dirkamh timi cu midang va bawmhchanh le an herhnak zawn ah va dirpi khi asi. “Azei asi hmanh ah, nangmah nih na kan dirkamh a hauko “ timi bia hi theihpah lengmang asi. Hibantuk bia chimhnawhmi cu bochanmi cungah chimmi asi. Midang nih bochannak lianpi he ‘nangmah lo cun’ timi thinlung he fuh le panhmi si cu a sunglawi tukmi asi. Bochanmi si cu minung man kan ngeihnak kan limhaang zong a rak si.

Laimi innchungkhar cio hi kan i dirkamh ding tluk in kan i dirkamh, kan i zuanhnawhlo ruangah duhning tluk in kan i bochan ngamcio kho hnalo. Tar le kum upa cu tthiangtthunh i tthunhlo cun umkal an ngamh tilo. An kutke a fek kho tilo. Tthiang tthunh lo in umkal ter kanduh hna ahcun an kut tein tlaih i hruai an herh. Cucu dirkamh asi. An sining nih a tlinh tilo mi kha kan hmurkaa, kan ngeihchiah le kan thazaang hmangin kan bawmhmi hna khi dirkamhnak kan timi asi i, cucu annih caah tlamtlinnak asi. Mizeihmanh hi dirkamh haulo in kan nung kholo. Chiatni, tthatni ah dirkamh kan herh. Tthatni asi ah, chiatni asi ah kan tonciomi asi. Chunhthah le rianbawmh kan herhcaan ah dirhkamhtu kan herh. Kanmah lawngin cun mual a phoding kansi dih. Puai phunphai tuahduh lebang ahcun dirkamhtu ngei loin tlamtlin khawh timi a um kho lailo.
Committee pakhatkhat, Bu pakhatkhat zongah dirkamhtu ngei loin asi kholo. Cucaah thinlung ruahnak a chuah khotu ding, a herh ahcun chawva le thazaang a chuahkho hnga dingmi upa kha Dirkamhtu ah thimchih le telhpeng asi. Ruahnak petu tiin acheu nihcun an hman, nain ruahnak petu timi zong hi dirkamhtu cu ansi tthiam ko. Dirkamhtu Committee timi hrimhrim in a au le a tuahmi tampi an um ve.

 

Laimi hi kan pupa chan in, Lawkih chan hrimhrim in pakhat le pakhat ai dirkamh mi miphun, thlachiatruah lungput le nunphung a ngeimi kansi. Atu Khrihfa kansi hnu tu ahhin a zordeuh. Atu cu sipuazi chan asi cang caah kan i dirkamhnak thazaang a zordeuh cang tiin ka hmuh. Tlangzamh timi hrimhrim a um kho tilo. A lian a hme hmuhton kan ngeih ah chawva rumro ah kan thlen. Sahleh, tisik anhnah i tthenh timi a umtuk tilo. Hinih hin pakhat le pakhat i dirkamh nak thazaang zong a zorter. Nihin ah dirkamhtu ttha a ngeimi lawng ‘Mi’ ah an i chuah. Dirkamhtu ngeilo, tangka hram a chuahpiaktu ngeilo caah rum khawh asi lo. Tulio kan Chinram le kan khuatlang ahhin bawmtu, dirkamhtu ngeilo, sifak harsa, hmeinu hmeipa le ngakttah fa ca ahcun innhmun, lohmun le innlo ttha ngeihding hi a fawilo taktak. Rualchan ttha, cozah zung ah nawlngeimi dawtu, hnakkar tenhtu ngeih a herh. Cucu dirkamh kongah Lairam khuasami dirhmun asi.

Cachuah kantimi zong hi dirkamhtu ttha ngeihlo ahcun tangka thazaang sawhsawh lawngin pehtlai le reltlaak in ai chuah kholo. Tck: Laitlang i thlachiar an chuahmi Cazual pakhat, khi dirkamhtu tthittha in a ngeihlo caah rel awk a tlaak tilo. Day a out cang. Aruang a um ve, dirkamhtu a ngeih huaha lonak khi. Caholh lei Serectary khi caholh lei thinlung a ngei i, carel cattial a huam le a thiammi si a herh. Computer in cattial tik ah cattialtu nih a cattialmi biafang le careltu hna upa thiam in fel taktak a herh. Kum kuahra chung Cazual an chuahmi cu rel awk tthalo bak in print asi. Cattialtu nih a ca hmanh ai theihkho lo tiangin cafang ai palh zungzal. Cutik ah cattial huamdeuhmi Mino tampi an lung a dong i, cattialnak in dirkamh an huamcio tilo. Cucu khi Cazual kongah ka hmuhning asi i, tahchunhnak bantuk ah ka van charmi asi.

Nihin ahcun Online Media tamtuk a umcang fawn tik ah Print Media hi uarlo chin leng mang asi. Cucaah Print Media ahcun Editor a ttuanmi nih lungsauh, felfai, teimak le ca tampi rel le tawlrel thiam a herh. Mi capar ttialding pekmi tthatthi in Edit tuah, Proof Reading tuah huaha huamlo ahcun Market a bi chin lengmang rihlai. Dirkamhtu ttha ngei dingin feldeuh a hau i, biatak thlak deuh in Editor nih tawlrel thiam ahcun dirkamhtu ttha a ngei tthan ko lai, tihi langhter ka duh. Dirkamh hi kan duhdih. Asi ahcun dirkamh duh dingin kan nunnak hi midang caah caanpek deuh ve a herh. Peknak le siannak hi rumnak zoh in asi lo i, lungput in asi. Cu lungput cu dirkamh kan timi muru asi.

Dirkamh