Donald Trump Nih US Chungah North Korea Rammi Khualtlawn Phihnak A Chuah

North Korea

U.S. nih Iran, Chad, Libya, Syria, Venezuela, Yemen le Somalia rammi telh in North Korea rammi hna zong U.S. ram chung khualtlawn/luh phihnak a tuah lai tiah theih a si.

Hi phihkhamnak thar hi October 18 ah fehter le thawk a si lai. Muslim ram deuh pawl phihkham a rak sinak lengah North Korea le Venezuela rammi pawl phihkhamnak cu faak deuh dingin tuah dingah chuahpi a si.

 “North Korea hi U.S. Cozah he zei ti hmanh in riantuannak an ngei lo, cun a herhmi konglam peknak/theihternak an tlinh lo”, tiah chim a si.

North Korea lei in U.S. ah a tlawngmi hi an tlawm ngaingai cang tiah khualtlawng tlangtlaknak zungbawi pakhat nih cun a chim.

 “President dirhmun in, U.S. ram le rammi thatnak le runvennak hi ka huhphenh hrimhrim awk a si”, tiah Trump nih a chim.

Zungbawi hna nih cun hi phihkhamnak chuahmi ruangah tha tein visa pek a si ko mi hna cu donh an si lai lo tiah an chim.

Hi U.S. ram chung khualtlawng phihkhamnak hi US Department of Homeland Security (DHS) sinah a herhmi konglam theihternak a tuah duh lomi ram hna caah chuahpimi a si.

“DHS Secretary nih cheukhat ram pawl caah faak deuh in zohhlatnak le phihkhamnak tuah dingin a chuahpi ve cang ko”, tiah atu lio DHS Secretary Elaine Duke ruahnak petu, Miles Taylor nih a chim.

Trump nih cheukhat ram pawl phihkhamnak a rak tuahmi bantuk si loin, U.S. zungbawi hna nih hi phihkhamnak phung thar kong ah a thla thla in ramdang cozah hna le riantuantu bu hna he hmunkhat ah riantuan a si cang tiah an chim.

Hi phihkhamnak hi passport chuahpiak a simi hna hi ralhrang he pehtlaihnak a ngeimi an si le si lo, phungbuarnak a tuah balmi an si le si lo konglam theihternak/langhternak a ummi le um lomi zoh in chuahmi a si.

U.S. DHS nih vawlei cung ram vialte hi U.S. ram a tlawng dingmi hna konglam theihternak cu ni 50 chung caan pek in an sinah thanhnak an tuahter hna. Asinain, hi ram 8 hna hi phunglam a zul lomi an si.

 “U.S. ram tlawn phihkhamnak hi faak deuh le biatak deuh in tuah awk a si cang, hi hi ramkhel lei kal ning cu a dik theng lai lo nain”, tiah Trump nih a tial.

Hi kong ah soiseltu hna nih cun muslim ram deuh lawngte phihkham a si tikah, ‘biaknak lei thleidannak in US phunghrampi a buar a si, cun a nawlngeihnak hi a hlei luan in a hman’ tiah Trump cu sual an phawt.

Ref: Reuters/AP