Elizabeth Sui Dang I A Ruak Cu Myanmar Ah Tlunpi A Si Cang

Elizabeth

September 8, 2018 chun laiah ihnak khaan chungah a thih hnuah hmuhmi Elizabeth Sui Dang (Sui Dawt) i a ruak cu Myanmar ah tlunpi a si cang tiah theih a si.

Nihin zaanlei sml 7: 00 hrawng khan Lai Catholic Community of Malaysia (LCCM) nih a ruak thlahnak le thlacamnak an tuah hnuah Myanmar ah tlunpi dingin Vanlawngtual ah kalpi a si cang.

Nungak Elizabeth Sui Dang, kum 22 cu Thantlang peng, Surngen, Tisen B khua a si i Pu Mang Bawi le Pi Ni Thlei hna i an fale unau 5 lakah fahniang bik a si.

Amah hi mifel, mi daite a si i atu bantukin amah le amah a nunnak aa laaknak a ruang hi ahohmanh nih hngalh a si lo.

September 8, 2018 zinglei ahkhan “dawr ah thil a caw i inn a tin hnuah innkhaan chungah chun sml 12: 00 hrawngah hri in aa awk i a ruak in kan hmuh hi a si. Zei ruang ko ah a si cu kan hngal bak lo”, tiah amah naihniam khuami pakhat nih a chim.

Atu bantukin mual a kan liamtaakmi Elizabeth Sui Dang i a ruak cu Malaysia in zinglei sml 9: 15 ah tlunpi a si lai i Yangon ah zinglei sml 10: 45 ah a phan lai. Cu hnuah, Yangon in a khua, Tisen ah tlunpi a si than lai.

A ruak tlunkalnak lam a tluan khawh nakhnga le taantaakmi chungkhar, unau, sahlawh, rualchan hna caah thlacampiak rih hna ko u sih tian kan in sawm hna.

[Nawlnak : Hi kong he pehtlai in website catialtu ahohmanh nih thawngpang nan zamh chap (nolh) nakhnga lo kan in nawl hna]