Hakha CND ‘Zatlang Paih’ Le ‘Zuamcawh Paih’ Ah World Champion Salai Rung Lian Ceu Nih Bual A Co

Rung Lian Ceu

Hakha i tuahmi Chin Miphun Ni ‘Zatlang Paih’ cu February 19 chun in thawk a si i zaan suimilam 12: 00 tiang tuah a si. US lei in Chin Miphun Ni paih ruah le chungkhat cingla tlawn ruah ah a rak phanmi World Champion Salai Rung Lian Ceu cu zaan sml 11: 30 hrawng in a chuak tiah theih a si.

Salai Rung Lian Ceu nih cun paih a luh minute 20 chung bakah minung 6 cu voi taktak in a tei hna i zatlang paih ah bual a co beh. Hakha Khuathar pathawng pawl cheukhat zong a tengh hna, kan hnu kum champion Thawng Tling zong a tei tiah theih a si.

Zahan Salai Rung Lian Ceu nih a tenghmi hna le a tei hna ning zoh tikah fawi tuk in a tei hna. Ngakchia tengh in a tengh hna. Minute 15 in 20 karlak chung bakah a phomh dih khawh hna.

Salai Rung Lian Ceu Laitlang a phak hlanah a aukhuang lengmangmi pawl kha an chuaklang ngam ti lo. Zahan zatlang paih ahkhan pathawng 3 hrawng cu a tei cang hna. Zahan bual a co khan cheukhat Laikhal pathawng pawl cu a therh in a therh cang hna.

Nihin zuamcawh paih ah Salai Rung Lian Ceu nih minung 3 a tei hna i Bawi Hlei Sang he Semi-final an kai. Bawi Hlei Sang cu minute 1 chung, mitthep hlan bakah voi 2 a tengh colh.

Tawk Hre le Van Ram Or hi semi-final ah an i tong nain Van Ram Or cu a keng/kut aa hrawh caah an pai ti lo i Salai Rung Lian Ceu le Hakha Khuathar in Tawk Hre cu final an kai.

Minute 5-10 karlak ah Salai Rung Lian Ceu nih Tawk Hre cu voi 2 a tengh colh i zuamcawh paih ah bual a co. Zatlang paih pakhatnak laksawng Ks. 300000 le taisawm, cun zuamcawh paih pakhatnak laksawng Ks.500000 le taisawm cu Salai Rung Lian Ceu nih a pom. Salai Rung Lian Ceu nih Champion laksawng a co hi a voi 10nak a si cang.

Zuamcawh paih ah mincazin pemi hi minung 24 an si nain minung 4 cu an chuak ti lo, cun minung 3/4 hi an i khawnden ruangah an i pai ti lo ti a si. Salai Rung Lian Ceu tih ruang hna ah an kut le an keng zong an i hrawk dih rua ti awk khin an um.

Tu kum Hakha CND puai cu a hlunghlai khun ngaingai. Minthang hlasak thiam tampi an i tel lengah Salai Rung Lian Ceu paih zoh duh hrimhrim ah khuate lei in Hakha ah a pokmi an tam taktak.

Paih zohtu zong minung an tam hringhran. Salai Rung Lian Ceu paih zoh duh ah Myammar ramkomh vuanci khuallian le ramkulh vuanci hna zong an i thawh hna. Tangka (Kyats) a thongthong le a tawngtawng in Salai Rung Lian Ceu laksawng petu zong an tam taktak i an pek zat zong theih khawh a si lo.

US ah Salai Rung Lian Ceu hi voi 10 aa pai cang i cu chungah voi 8 bual a co cangmi pasaltha taktak a si. Voi 10 aa paihnak chungah 2014 kum Indianapolis ah tuahmi Chin National Day ah Tial Cung Thang nih a rak tei i 2015 kum Indianapolis thiamthiam ah tuahmi Chin National Day ah Kap Tawng nih a rak tei bal.

2014 le 2015 CND (Indianapolis) ti lo poah cun Rung Lian Ceu hi aa paih chung vialte sungh timi a ngei rih lo. Atu tan Laitlang a rak tlawn zong hi World Paih Championship dirhtu le haotu Pu Ang Cung nih a rak zulh tiah theih a si.

Salai Rung Lian Ceu cu 03 July 1994 ah Hakha peng, Chuncung khuami Pu Si Hmung le Pi Tum Zing nih an rak ngeihmi fapa a si. 16 Dec, 2006 ah Malaysia a rak phan i 13 Sep, 2007 ah USA a phan. Atu hi Taxes, Amarillo college pakhat ah Automotive Technology (Auto-Technician Engineering) a kumthumnak a kai liopi a si.

A tungkhaan hi pe 5 le letmah 8 a si i pound 202 a rit. Pumrua tha, pa dawh a si. Amah hi hlan lio minthang paihthiam Pu Mang Cung i a tupa a si.

Ref: The Chinland Post