Irrawaddy Cozah Nih ‘Chin National Day’ Tuahnak An Liam Cang Lai

Chin National Day

A ra laimi 2019 kum ahcun Irrawaddy Pengkulh cozah nih Irrawaddy ah tuah dingmi Chin National Day hmannak ah a dihheumi an liam dih cang lai tiah theih a si.

Irrawaddy pengkulh chungah hin 2012 kum khan Chin National Day rak tuah a si i hi hlan vialte cu cozah nih bawmhnak a rak chuah/pe bal lo.

Hi kong he pehtlai in Cawn Nithumni ahkhan Irrawaddy pengkulh Parliament ah Kyaunggon peng phungsertu U Htein Win nih biahalnak a chuahpi hnuah Irrawaddy pengthen Planning and Finance Minister U Htay Win nih atu bantukin thanhnak a tuah.

 “Hmai kum, cozah riantuannak kum 2018-19 ahcun Miphun-tenau Covo Kilvennak Phung, Dal 13 ning in Chin miphun hna i an nunphung, an holh le an ca hunchoternak caah tangka sangsennak kan tuah cang lai”, tiah U Htay Win nih a chim.

Miphun-tenau Covo Kilvennak Phung, Dal 13 nih a langtermi cu pengkulh asiloah ramkulh cozah nih kum khat chung hman ding tangka sangsennak ah miphun-tenau hna duhherhnak ca hman awk chiahpiak hna ding ti hi a si.

Kum 2012 thawk khan Chin National Day hi Irrawaddy pengthen, Kyangin le Myanaung ah a changchang in rak tuah a si. Tu kum a voi 70nak Chin National Day cu Pathein khualipi ah Irrawaddy pengkulh huap in Feb 20 ahkhan Irrawaddy cozah bawmhnak le Chinmi hna bawmhnak in tuah a si.

 “Harsa ngaingai in kan sal chung tangka chuah in Chin National Day cu kan tuah. Phungning tein pengkulh cozah nih hmai kum lei Chin National Day tuahnak caah tangka sangsen an chiah lai ti a si tikah kan i lawm. A lawmh zong kan i lawm”, tiah Chin National Day puai tuahnak tawlreltu committee haotu Salai Myat Thu nih a chim.

Irrawaddy pengkulh ah khuasami Chinmi hi 20,000 leng an si i a tamdeuh cu Kyangin, Myanaung, Ingapu le Ngapudaw khua ah an um hna i Maubin, Myaungmya, Labutta, Pathein le hmun dangdang um hi mi tlawm an si.

February 20, 1948 ahhin Chin miphun hruaitu minung 5,000 leng hi Chin Ramkulh, Falam ah i thithruainak kong ah khuakhaan lairelnak an rak ngei hna i cu hnu cun Chin National Day (Chin Miphun Ni) cu sunglawi ngai in rak hman a si.

Ref: The Irrawaddy