Israel Khuapi Jerusalem cuhnak, Tel Aviv Israel Khualipi A Rak Canning

FILE - In this June 17, 2016 file photo, Palestinians pray in the Al Aqsa Mosque compound during the Muslim holy month of Ramadan, in Jerusalem's Old City. The Palestinians are ringing alarm bells over Donald Trump's stated intention to relocate the U.S. Embassy in Israel to contested Jerusalem, fearing quick action once he takes office as U.S. president next week. They say an embassy move would kill any hopes for negotiating an Israeli-Palestinian border deal and rile the region by undercutting Muslim and Christian claims to the holy city. (AP Photo/Mahmoud Illean, File)

Sertu Pathian nih a mi Israel miphun pawl hna cu miram cia a simi Kanan ram pek dingin an pu Abraham sinah biak a rak kamh hna bantukin Joshua le Caleb nih Israel mipi cu an rak luhpi hna.

David siangpahrang nih Jerusalem cu 1010 BC ah a rak tuk i, “David Khuapi” (City Of David) tiah a rak ser caah “United Kingdom of Israel” tiin Israel ram khualipi ah a rak cang.

Jerusalem ahcun David nih Pathian caah Biakinn sak dingin a rak hal (2 Samuel 7:1-17), nain Pathian nih a rak sianh lo (1 Chanrelnak 22:8) caah a fapa Solomon Siangpahrang tu a rak sakter (960 BC). Cucaah Jerusalem “Biakinn Thiang” cu “The First Temple,” tiah an rak kawh i Israel miphun caah “hmunthiang,” ti a rak si. A si nain, BC 587 ah Babylon siangpahrang Nebuchadnezzar nih a voikhatnak a rak hrawk piak hna.

Kum tampi a rauh hnu, 688-692 AD ah Islam biaknak nih “Moriah tlang asiloah Temple mount,” timi Jerusalem Temple an saknak tlang ahcun “the dome of rock (Al-Aqsa Mosque),” timi Muslim biakinn cu an rak sak ve. Zeicatiah profet Muhammad cu mah tlangah hin Allah pathian he an rak itong i vancung a kainak tlang zong a si caah “kan hmunthiang,” a si an rak ti ve. Cucaah Jerusalem khuapi cu Islam biaknak i kan khuapi hmunthiang a si tiin a dir/aupi pengnak hi a si.

Jerusalem Khuapi cu vawlei pumpi i a laifang (heart of the world) a si bantukin le Sertu Pathian nih tinhmi a ngeihnak hmun Khuapi ropui a si caah, Israel miphun caah Pathian kamhmi khuathiang, hmunthiang le Khuapi rosung tiah an sunhsakmi a si. Cu ve bantukin Palestines ram zong nih kan ram, kan khuapi thiang a si ve, sungh kan duh lo tiah Muslims ram vialte nih an dirpi ve hna.

Vawlei cung daihnak ram cuantu a simi UN palai vialte hna zong nih an buaipi ve khawh hna lo caah le vawlei cung rampi buainak a chuahter sual lai ti phan ruangah “ram 2 khuapi pakhat,” tiah canter an duhnak zong a si phah.

Tel Aviv khuapi cu, Ahuyat Bayit tiah an kawhmi Jaffa khua hlun in aa thokmi a rak si. “Jaffa,” timi sullam cu “aa dawhmi (beautiful),” tinak a si. Ahuyat Bayit khuapi thar cu kum 1910 ah David ben Gurion le Jews pawl nih an rak thokmi a si. Jaffa cu Siangpahrang Solomon nih Biakinn saknak cedars thing pawl Lebanon ram in a rak phortnak tilawng lam zong a rak si.

19th century ah Nitlaklei ram (European) ral nih Rom cozah pennak cu an rak chimh hna i Jaffa khuapi cu an rak tharchuah than. Cun 1916 kum ah Tel Aviv cu Turkey nih an rak uk hna nain, kum khat a rauh hnu, vawlei ralpi 1st nak ah Nitlaklei European ral pawl nih an rak tei hna i Israel ram cu Nitlaklei ram nih an rak pen hna. Cu hun ah a kenkip lo i aa thekmi Jews miphun pawl cu Tel Aviv ah an rak kir than hna.

Kum 1921 ah Arabs Jaffa nih mitlawmte a simi Jews pawl cu an rak doh hna caah Jaffa Jews pawl cu Tel Aviv ah an rak i thial ve hna. Cucaah Tel Aviv khuapi ahcun Jews miphun a hung karh deuh cuahmah ve i minung 45,000 tiang a hung phan ve.

Kum 40 a rauh hnu, 1941 kum ahcun hmun dangin ral a rak zammi refugees pawl zong an karh chin lengmang ve caah milu 145,000 tiang an rak karh than.

David ben Gurion nih Israel ram luatnak (Independence) an hmuh ni 1948, May 5 ah Tel Aviv cu Israel ram khualipi a si cang tiah a rak thanh hnu in vawlei cung pumpi nih an rak cohlan piak hna. Mah lioah cun Tel Aviv cu milu 200,000 an rak phan than.

A si nain, 1949 kum ah Israel miphun pawl cu Jerusalem khuapi ah an rak kir dih than hna i Jerusalem cu khualipi si awkah an rak aupi than. A si nain, vawlei cung rampi nih Jerusalem khualipi si than ding cu an rak dirpi ngam ti hna lo. Cun 1950 kum ah Tel Aviv le Jaffa cu zatlang uknak pakhat ah a hung dirti.

Cun 20th Century a hung phak tikah milu an hung karh chin lengmang cang caah Jews pawl le Jaffa pawl cu hmunkhat ah Jaffa khuapi changtu Ahuyat Bayit khuapi an rak tlakmi ahcun an i thial hna. Cu hnu ahcun Ahuyat Bayit khuapi min cu Tel Aviv (Hill of Spring) tiah an rak thlen kha a si.

Tuchun ni ahcun, Tel Aviv zatlang khua ngan a simi Bat Yam, Bene Baraq, Holon, Ramat Gan le Tel Aviv Yafo, cun a dang khua 9 hna tiin an hung karh hna caah milu 1.38million an hung phan, Israel ramchung nunning a san cemnak bik khuapi ah a cang.

Lian Cenhrang