Jerusalem Khualipi Buainak Aruang: Isak Fa Israel le Ishmael Fa Muslim

Jerusalem khualipi buainak aruang

Jerusalem Khualipi Buainak Aruang: Isak Fa Israel le Ishmael Fa Muslim

An thawhkehnak tuanbia ka tial hlan ah President Trump le Jerusalem khualipi kong ka tial hmasa lai.

Khualipi Buai Jerusalem le President Trump

US President dangdang nih an duh nain an tuah ngam lo mi kha President Trump nih a tuahtop. Jerusalem hi Israel khualipi a si tiah a thanh. Israel khuapi Tel Aviv in Jerusalem ah US Embassy tthial a si lai.

Vawleicung ram tampi le Islamic ram pawl nih tluang an khawnhnawh, an tthihphaih len nain President Trump nih raltha in a pah tthiamthiam i, thimnak campaign lio a biakam a tlinter.

Palestinian Muslim le Muslim ralhrang nih buainak fak an chuahpi lai, thisen a luang lai ti hi a fiang ngaimi thil hnuzul a si.

Abraham Tefa Veve Israel le Muslim

Abraham le Sarah fapa Isak cithlak in Israel miphun an chuak. Abraham le a salnu Hagar fapa Ishmael ciruang in Muslim an chuakkek.

Isak cu Pathian biakam fa a si, Pathian nih Abraham sinah a kamhmi tefa kha. Ishmael cu minung khuakhanmi fa a si, Sarah nih a va sinah Hagar pawiter a fial mi kha.

Pathian nih Ur khuami Abraham kha Canan ram kan pek lai tiah a kamh i, cuka ah cun a kal. Canan miphun cu Noah fapa Ham tefa an si. Ham cu a pa Noah nih zu a rit lio ah chiat a serh mi kha a si. Nihin ah Canan miphun cu ahote set dah an si tiah tehte fek hmuh khawh a si lo.

Muslim nih Abraham cu an chuahkehnak an pu ah an pom i, Pathian biakam fa si kha an i cuh. U le nau bak an si nain Muslim le Israel hi rul le ral bang an do bikmi an si, Jerusalem khualipi zong cu an i cuh lengmang i, nihin tiang in khuaci mui in an um.

An I Cuhmi Jerusalem Khualipi, Biaknak Khuathiang

Jerusalem khualipi tuanbia ka tial vima ahcun a sau tuk lai. A com tete in ka run com lai.

Jerusalem khualipi hi Jew (Israel) biaknak, Khrihfa biaknak le Muslim biaknak i khuathiang a si.

Khrihfa biaknak caah vailam i Khrih an tahnak Kalvari tlang tehna, Khrih ruak vuinak hmun i sakmi biakinn  Church of the Holy Sepulchre  tehna, Olive tlang tehna tbk. a umnak khua a si.

Israel khualipi a si, a bik in East Jerusalem a simi Jerusalem khuahlun khi Siangpahrang David Khualipi a si i, 960 B.C. ah Siangpahrang Solomon nih Temple a saknak hmun a si. Cu hmun cu Abraham nih Isak thawi a timhnak Moriah tlang kha a si i, cu Moriah tlang cu nihin ah Temple Mount tiah Israel nih an auh.

Solomon Temple a rawh hnupi 45-425 B.C.ah Profet Nehemiah nih Solomon Temple cu a sak than.

B.C a dih hnu A.D 632 ah Muslim profet Muhammad kha khual a tlawng i Moriah tlang cu a pal. Cuka ah cun a riak i vancungmi sinin langhnak a hmuhnak tlang a si tiah Muslim nih an ti. Hika hmun ah profet Muhammad hi a thi i, van i a kainak tlang a si, an ti fawn.

A.D. 637 ah Muslim siangpahrang Omar nih Jerusalem khua uktu Byzantine Khrihfa kha a hun tei hna.

A.D. 691 ah Muslim nih Moriah tlang ah cun Muslim biakinn the Rock of Dome timi khi an hun sak.

Pathian Bia bang, A mi Israel miphun cu kakip ah a tthekdarh hna i, kum 1948 ah a funtom than hna, U.N. nih Israel ram khi an ram tiah a hun pompiak hna.

Jerusalem hi BC in AD chan ah Assyria, Babylon, Persia, Greek, Rom, hlan lio Khrihfa, Muslim siangpahrang pawl, British tbk. nih an rak tuk i an rak uk hna. Israel miphun cu an i thekdarh ko nain zeimawzat nih Jerusalem khua an hlumh tthiam ko.

A hnu bik a uktu cu British an si i, kum 1948 i U.N. nih Israel ram a hun pompiak hna hnu in ramkawp in an ukmi Israel le Jordan an i then. Kum 1967 lio Ni 6 ral ah Israel nih Jordan sinin East Jerusalem khi a rak tuk i, a rak lak.

Muslim biakinn Rock of Dome belte hrawh ahcun a buai tuk ding a si caah Israel nih Jordan kha zohkhenhtu tuanvo a sianh.

Asinain Israel mi lung a thi lo, Solomon Temple hmun a si tiah Rock of Dome kam um Tahnak Vampang hoih in thla an cam. Cu lawng cun an lung a thi lo, Rock of Dome hmun khi ni khatkhat tinco than an duh.

Palestinian Muslim Nih Jerusalem Hi An Khualipi Ah Ser An Duh

Mitthawng Samson nih Gaza ah Filistine miphun kha an rak phomh tawn hna. Filistine kha Israel nakin a rak tthawntthat deuh lio chan ah a si.

Hi nih a langhtermi Israel le Palestinian hi raltonh in khua an rak sa, khuacaan a kal lengmang i, i cawhnuk in khua an hung sati. Jerusalem khualipi tiangin i cawhnuk in khua an hung sa.

Israel ramchung West Bank le Gaza Strip khi Palestinian Muslim nih fonh i ram khat ah ser an duh. Rock of Dome umnak East Jerusalem khi an khualipi ah ser an duh. Arab le Muslim ram vialte nih Palestinian hi an ttanpi hna.

Hitihin Israel le Palestinian nih Jerusalem an i cuh caah ramdang cozah vialte nih Jerusalem ah an Embassy zung an chia ngam lo, Tel Aviv khua tu ah an i beng viar.

Asinain kum 1949 ah Israel Parliament nih Jerusalem cu Israel khualipi a si tiah bia a khiah i, acozah hmunpi ah a hman.

A hawi tthabik U.S.hmanh nih Israel biakhiahnak a zulhpiak ngam lo, Jerusalem cu Israel khualipi a tipi ngam lo.

President Clinton le President G.W. Bush nih thimnak campaign an tuah lio ah Jerusalem hi Israel khualipi pompiak ding le U.S. Embassy thial ding bia an kamh hna nain a caan  a tling tikah an i zukphiak.

Zeicatiah Arab ram pawl tbk. nih awlok an chawnh hna, tluang an khawnhnawh hna tikah a buai tuk ai  lai an ti i an kalpi ngam lo.

President Trump zong nih thim lio campaign biakam a ser ve i a hun kalpi tikah Arab ram pawl nih awlok an chawnh ve, ‘thisen luan ding le ralhrang tiang’ chuankhan in an thihphaih. Secular media vialte ti awk le ramkip cozah ti awk in bia fifi in an tongh nain President Trump nih raltha in a pah tthiamtthiam.

Jerusalem cu Israel khualipi a si tiah dotla in a thanh cang. Embassy a tthial lai. European Union le U.N. le Pope Francis nih fakpi in an soisel colh.

Baibal le tuanbia dik nih fiangte in Jerusalem cu Israel khualipi a sinak an langhter nain Muslim cathiang Koran nih Jerusalem cu Palestinian khualipi a si, a ti bal.

Muslim nih Jerusalem an duhnak cu, an profet Muhammad  langhnak a hmuhnak le a thihnak hmun an ti caah Rock of Dome biakinn an sak caah a si bik.

Rock of Dome cu Muslim hmun thiang bik a si lo, Mecca tu a si. Thla an cam tikah Rock of Dome cu a tawkawng an chit i Mecca lei hoih in thla an cam.

Israel Jew tu nih Tahnak Vampang hmailei an hoih i, Solomon Temple hmun Rock of Dome hoih in thla an cam, an caah hmun thiang bik a si caah.

President Trump biakhiah nih hin zeitluk fak in dah Muslim sermi buainak a chuahpi te lai ti rak cuan ve ko.

Caan dongh lainak kong, Baibal nih a chimmi zong  rak philh hlah. Khrih dodaltu pa (anti-christ) nih khi hmun ah khin remnak a ser te lai. Cucu buainak fakpi a chuah hnu ah a si te lai.

Hi kong hi  Profet Daniel nih ‘thiotu fihnung (Khrih dotu)’ nih hmunthiang Biakinn i a dir te lai a timi kha a si. Hi bia hi Jesuh hrimhrim nih a nolh ko khah(Matt. 24:15-ff; Dan. 9:27; 11:31).

Chingchiah: Hi cabia cu, Salai B. Chan Khar nih miphun zawnruahnak lungthin tak he a thawlhmi a si. Cuhlan caan zongah Capar țhațha tampi a rak kan tialpiak tawntu a si. A cungah lunglawmhnak tampi kan ngei tizong van langhter țhan kan duh ko. A nih hi, a chuahkehnak khua cu Thantlang peng Tlangpi khua a si i, a fale minung 3 le tiin an chungtling in Australia ah khuasa mi an si.

Jerusalem khualipi buainak aruang