KEDAN (zeitluk in dah a biapit)

Kedan

KEDAN (zeitluk in dah a biapit)

Kedan cu minung nih kan umkalnak kip ah kan ke ah kan i hruk, bunhmi khi asi. Sai/Vui zong khi rian an ttuanter tik ah kedan a danhtermi an um ve. Rang zong rangleeng an hnultermi pawl khi thiir kedan an tuahpiak i, cuticun an danhter ve hna. Kedan hi zeicadah kan i hruk/danh ti ahcun kan ke caah thil ttihnung asimi, a zumhaar le a hakmi thil pakhatkhat chungin kan ke nih tuarfahnak a tonnak hngalo himnak caah hmanmi asi ti cu theihcio dawh kansi.
Kedan hi a phunphun in ser asi. Acheu cu a hakmi, acheu a nemmi. Acheu a ritmi, acheu a zaangmi tiin a um. A rit le a hakmi paoh an tlo hlei tuklo i, a nem le a zaangmi paoh an tteh a fawikhun tinak asi lo. Achiat tthat, umkalnak hmun vawlei um tuning le kan cawlcangh chiattthat nih a ngeih ve.
Kedan cu kan ke nih a lamhmi hmun pakhatkhat i hnawmtaam le rimchia vialte kan lamhhnawhnak thilri pakhat asi. Ai dawh le man tampi asi ko zongah kan hman hnu cu a tanglei cu a thuurhnawm. Kan thinlung nun hrim ah a thuurhnawm. Micheukhat cu cutluk a thuur hnawmmi cun, mipakhat cung i kan thinhun tik ah tuknak le chehnak ah a hmangmi kan um tawn. Hihi ai dawhlo tukmi tuahsernak asi. Chiatserh phunkhat bak asi. Kedanh le Hmunphiah, nu hni le kaa chung cil in, kan thinhunnak langhter hi minung zia ah fih a nungbak mi asi. Phundang cun “va thi, va pul. Chiat kan serh” timi tlukbak asi. ‘Tluk’ hmanh si hlah, asi hrimhrim ko cuh. Thilri dang pakhatkhat hmangin midang cung i thinhunnak langhter hi cu a tthatlo ti theih bu ah ai dawh cah deuh. Nuhni hna in tuk, cil hna chaak, kedan in tuk le cheh, hmunphiah in tuk tbk hi minung ziaza asi lo, khuachia zia asi. Cucaah hihi cu kan hrial le kan dohbak a herh ko.

 

Kedan nihhin minung a kan dawhpi i, kan tungtai a tthatter ve. Cun kan lamhmi hmunthuur lak i a ummi zawtnak le rungrul chungin a kan khamh. A herhtuk tihi theih dihmi asi. Kedan hi mahle i remning cio in kan van i danhtik ah kan i remdih. Nu cheukhat belte kedanh dil sang khi kan sining hoihlo tiangin kan uar i, kan hmang tawn i, nau inn tthatlonak le kutke i hrawhsual tawnnak tiang a kan phakpi. Kedanh dilsang danh ruangah nu a mualphomi tamtuk an um. Thiamlo buin chandawi ruangah asi, tiko usih. Zei a va si zongah kedan hi kan i tlaakmi te i danh thiam hi a ttha. Kedan teet tuk i danh le i lontukmi i danh cu caan sau i danh ahcun a harkho taktak hi asi. Cucaah nupi tthalo he khuasak cu kedan teettukmi i danh he tahchunh asi phah kha. Midang innlen i inn thiang tuk i an tuahmi ah kedan i phoihhnu ah luh ding asi. Kan inn ah kai phoih ballo tiin ai phoihlo tawk an um. Hawi nih an i phoih ahcun i phoih veding asi ko. Pulpit cung kai zongah ai phoih an um, phoihlo an um. Hmunthiang ahcun i phoih awk asi. Hmun thuurhnawm ahcun i danh awk asi. Ttamhnak dawr, Market, inn saknak hmun ahcun i danh bak ding. Cubantuk cun a herhnak paoh ah kedan cu i danhpeng awk asi. Cu pumhimnak asimi kedan cu midang ca’h fahnak pekdingmi ahcun hman tilo ding tiangin kautuk in ka van cawhdih ko hih.

Kedan