Lawmh Awk Le Zohchunh Awktlak: Australia Ah Chin Pa Thangthat A Tong Ngaingai

Chin Pa

Chin Ramkulh, Myanmar in ralzaam pakhat cu ram chungah siseh, ram lengah siseh, a riantuannak zoh tikah upat awktlak taktak a si.

Australia ram, Bright khua ah khua a sami Chin ralzaam Gei Lin cu Australia ram caah siseh, a kaltaak cangmi a khua caah siseh a riantuannak cungah thangthat ngaingai a si.

Bright khua hi Victoria peng chungah a ummi a si. “Khua lai bakah fingtlang le tiva vialte an um. Thingkung hna zong an i lo hna lo. Aa dawh tuk hringhran, hi hna nihhin umkhuasaknak ah ka hna an ngamter”, tiah Gei Lin nih SBS ah a chim.

2004 kum ahkhan kan khua in ka rak zaam i Malaysia ram tupi chungah a thla in ka rak taang. Cu hnuah tlaihkhih le thongtlak ka tong i thi dengmang in pawtaam hna k arak tuar tiah Gei Lin nih a chim.

“[Malaysia ah] thong ka rak tla i thla ruk chung khawi hmanh ka rak kal kho lo. Thong chungah ka thi men lai tiah ka rak ruah….Pathian sinah thla ka cam len”, tiah a chim.

2010 ahkhan (atu ah) fa pali i hringtupa a simi Gei Lin cu a chungkhar he ralzaam dirhmun in Bright, Australia ah an rak phan.

Zaanghleicawi bakin a umnak khua chungah Australia ram sin a lunglawmhnak caah dum le innlo thianhhlimh rian a rak tuanpiak hna.

Gei Lin nih cun thla zeimawzat chung bak hi a riantuan man ah tangka zeihmanh a rak cohlang duh lo tiah North East Victoria Multicultural Association in Alison Lord nih a chim.

 “Zaanghleicawi rian a tuanmi caah tuan man pek hi an duh ko nain a cohlang hna lo. Tuan man tangka pek na duh lo ahcun hi hnuah nangmah hi kan in au ti lai lo tiah an rak ti lengmang. Atu ahcun a riantuannak ah a hlawhtling ngaingai cang”, tiah Alison nih a chim.

Gei Lin cu amah pumpak tein innlo/dum thianh riantuannak a tuah i rian tam a ngeih caan ahcun minung/hlawhfa panga tiang a ngeih hna i a rian a tam ngaingai.

“Atu ah ka caah rian hi a tam tuk hringhran cang. Atu ahhin ka sinah riantuantu/hlawhfa pahnih ka ngeih rih hna. Bright khua ahhin rian a tam taktak ko”, tiah Gei Lin nih a chim.

Asinain, Gei Lin nihhin a khua le ram cu a lungkil in a philh  rih hlei lo. Chin Ramkulh ah an khua sianginn saknak le siangcachim pawl umnak inn saknak caah $30,000 bak a kuat cang lengah atu ah an khua ah ti thiang a um khawh nakhnga ti laaknak caah tangka $20,000 kawlhawl aa timh liopi a si.

Bright khua nih Gei Lin cu an duhdawt ngaingai cang. Cun, Bright khua ah khua a sami Chinmi hna hi 20 hrawng cu an si lai tiah ruahdamh a si. 2012 in Australia a phanmi Chin ralzaam hi a tlawmbik 4,000 cu an si cang.

 “Bright khua hi ka khua /innlo cu a si ko cang, asinain ka thawhkehnak hmun le hma cu ka philh bal lai lo. Nuncannak ah kan zaamtaakmi khi a si, a liamcia ka nunnak kha ka ruat than duh ti lo. Midang ca i thil tha tuah lawng hi ka duh”, tiah Gei Lin nih a chim.

Ref: SBS