Melbourne Sehzung Meikang Phalh Khawh A Si Cang

Meithattu pawl theihter an si hnu suimilam 17 leng hnuah dat sivai ruangah a kaangmi steel tharchuahnak sehzung (company) meikang cu thah/phalh khawh a si cang tiah thanh a si.

Atu ahcun West Footscray i sehzung mei-alh cu phalh khawh dih a si ko nain meithattu pawl hi ni hnih/khat cu a hmun ah an um rih a hau men lai ti a si.

“Mei cu phalh a si cang ko. Hi kiangkap ahcun caan zeimawzat cu meikhu a zaam rih lai kan zumh, meithattu pawl zong a hmun ah umter an si ko lai”, tiah tu zaan sml 10 hnuah Melbourne Meithat Zung in riantuantu zungbawi nih a chim.

“Pawngkam le sang/tlang kip ah ralrin peknak le thawngthanhnak zong tuah a si, thawngpang thanh than lengmang zong kan i zuam lai”, tiah Meithat zungbawi nih cun a chim.

Altona, Brooklyn, Footscray, Kingsville, Newport, Port Melbourne, Spotswood, Sunshine, Williamstown le Yarraville telh in sang 21 ah hi meikang kong he pehtlai in felfai ten thawngthanh dih a si.

Meithat riantuantu zung hi Cawn Nilini, zinglei sml 5: 00 ah chawnh an si i a mei-alh kan zoh tikah mei a rak kanghnak hi suimilam zeimawzat cu a rak si cang lai tiah kan zumh tiah meithat zungbawi Mr Leach nih a chim.

Meithat riantuantu minung 140 hrawng hi a hmun ah tu zaan cu an riak lai i mei a zaam nakhnga lo naihniam tein an zohfel rih lai.

“Caan saupi atu bantuk mei lian hi Melbourne chungah kan hmu lo, a ngan ngaimi meikang pakhat a si”, tiah Mr Leach nih a chim.

“A pawngkam ah a herh tuk ti lo ahcun ahohmanh an tlawnlen ding kan duh lo. Mipi himnak hi a biapi taktak”, tiah Lakhruak Thilcang Kong Tlangtlatu Andrew Crisp  nih thawngla pawl sinah a chim fawn.

Hi sehzung meikang ruangah a pawngkam um cozah sianginn 11, ngakchia zohkhenhnak sianginn/hmun 38 le Catholic sianginn 8 cu khar a si i thaizing, Cawn Ningani ahcun an on than hna men ko lai tiah ruah a si.

Ref: SBS