Myanmar Ah Rohingya Ralzaam Pawl Kir Duh Loin An Chang

Rohingya

Cawn Nihnihni ahkhan aho ngeih lomi hmunhma, camp chung um Rohingya ralzaam hna cu Myanmar ah kirter than ding an si kong he pehtlai in Myanmar le Bangladesh ram hnih biaruahnak an ngeih hnuah Myanmar nih rammi sinak le humhimnak an kan pek lo ahcun kan kir lai lo tiah an chang tiah theih a si.

Myanmar in Bangladesh ah kan hnu kum August chungah a rak zaam hmasami Rohingya hi 6,000 an si i Myanmar le Bangladesh karlak ramlak hmun pakhat camp chungah khua an si hna.

Kan hnu zarh chungah khan Myanmar ah an kir duh lo ahcun a hnuzul thil an tuar lai tiah ralrin peknak a rak um tikah Rohingya pawl cu an duh zong duh lo zong ah kirter ding dirhmun khi an si.

Asinain, Rohingya zatlangbu hruaitu Dil Mohammad nih a liamcia caan chung sunghralhmi thilri hna caah man liamhnak, rammi sinak peknak le humhimnak tling peknak a um lo ding a si ahcun Myanmar kan kir lai lo tiah AFP ah a chim.

 “Kan duhnak tlinter a si ding lo ahcun Myanmar kan inn le kan lo ah kan kir than lai lo. Rammi sinak, kan nun humhimnak le covo vialte, sunghralhmi vialte liamh thannak kan duh”, tiah Dil Mohammad nih cun a chim.

Cawn Nihnihni ahkhan Myanmar le Bangladesh cozah riantuantu hna cu Rohingya ralzaam 6,000 kirthannak kongah ceihhmainak an ngei.

“Humhimnak tling an hmuh ding a si ko ahcun Myanmar kir than ding hi bia kan ruahmi vialte hna nih cun an duh dih ko”, tiah Bangladesh aiawh riantuantu lutlai Abdul Mannan nih a chim.

UN lei chimrel khotu Caroline Gluck nih cun Rohingya ralzaam pawl kirter thannak hi anmah lungtho te lawngin a si awk a si tiah a chim.

“Cheukhat Rohingya pawl nih an chim ning ahcun Myanmar kir than ding hi an tih, Bangladesh ram tu ahhin himnak kawl khi an duh”.

“Bangladesh ram ah himnak an hmuh khawh ding hi Bangladesh nawlngeitu pawl sinah nawlnak tuah kan tuah. Cun, kapkhat lei in Myanmar zong nih mah lungtho tein kir a duhtu pawl caah a himmi le a fekmi tlunter thannak an tuah ding zong a si”, tiah Caroline Gluck nih a chim.

Ref: AFP