Myanmar Cozah: Rakhine Ramkulh In Minung 500,000 Leng An Zaam

Rakhine

Rakhine Ramkulh ah i tukdohnak a can hnuah an inn le lo in a zaammi hna hi minung 500,000 leng an si tiah Rakhine Ramkulh cozah chungtuan Tin Maung Swe nih a chim.

 “Atu ahhin Maungdaw peng chungah minung 469,665 an um i hmun dang ah a zaammi hi minung 535,764 an si”, tiah Tin Maung Swe nih a chim.

Myanmar cozah nih Rakhine Ramkulh in a zaammi milu zat an langhter hi a voikhatnak a si. UN nih an rak thanh ning ah cun minung 600,000 leng an zaam ti a rak si i atu Myanmar cozah nih an thanhmi nakin 100,000 deng in a tam deuh.

February 15-17 i Myanmar le Bangladesh karlak tonbiaruahnak ah Bangladesh cozah nih Myanmar cozah sinah innchungkhar 1,673, a milu in minung 8,032 cazin an pek hna.

Thawngthanhnak Zung Minister changtu Aung Hla Tun nih Myanmar cozah nih hi hna cazin cu kan zoh i cazin an pekmi chungah minung 374 hi Myanmar ah kirter than hna dingin Bangladesh kan thanh cang hna tiah a chim.

Ref: Mizzima