Myanmar Nu Nih Cikcin In Kum 7 A Fanute A Hren

Myanmar Nu

THAILAND: Kum 33, Myanmar nu nih a fanute, kum 7 cu thir cikcin in Phuket peng, Thailand, an umnak inn hmaiah a hren caah nawlngeitu hna nih ralrinnak an pek tiah theih a si.

Hringtu a nu a simi Myanmar nu nih cun a fanute a hrennak a ruang cu mawtaw hna nih a pah sual lai asiloah pakhatkhat poipang hna a tong sual lai ti phaan ruangah le chimh a har tuk caah dawtnak in ka tuahmi a si tiah a chim.

Hi ngakchia nute hren a si lio hmanthlak cu Thailand ram zatlang thawngzamhnak ah phozar le mawhchiatnak langhter a si hnuah Phuket ngakchia le chungkhar zohkhenhtu bu lutlai Atchara Surakul le adang zung riantuantu hna cu Cawn Nihnihni zinglei sml 10:00 ah an inn ah an an va kal i dothlatnak an tuah.

Riantuantu pawl nih cun Myanmar nu le a vapa cu hi bantukin fale tuahto ding le hren ding an si lo tiah holhlet he chimhhrinhnak an ngeih hna hnuah Phuket Palik sakhaan ah an konglam halnak tuah dingin an kalpi hna.

Hi bantukin thil a can ruangah kum 7 ngakchia nute le a tapa kum 9 pate cu nawlngeitu hna nih chikkhat zohkhenhnak hmun ah an chiah chung hna.

Myanmar nu, hringtu nu nih cun a fanute hi chimh a har ruangah poipang a tong sual lai tiin cikcin in ka hrennak hi a si, cun Myanmar thiamthiam a simi a vapa thar he an ngeihmi nauno thla khat zong ka zohkhenh pah ruangah hi bantuk hin ka tuahnak a si tiah a chim.

Hi hna nuva hi an pahnih in innsaknak hmun ah rian a tuanmi an si. Kum 7 an fanute cu ka takpum cungah tukvelhnak hma zong an um, hi kongah a nu nih cun chimh  a har ruangah ka tukvelhmi a si tiah a nu nih cun a chim.

Hi Myanmar nu he a vapa thing he fa 4 a ngeimi a si i atu i cikcin in a hrenmi a fanute lengah kum 17 in 9 karlak a fale pathum cu a liamcia thla 5 ahkhan a sinah a uahmi hna an si tiah theih a si.

Ngakchia le chungkhar zohkhenhnak bu lei in riantuantu Atchara nih cun cozah nih a fale hna i chuh colh ding cu timhnak an ngei lo, asinain chikkhat chung cu a fale pahnih cu hmun dang ah an zohkhenh hna tiah a chim.

Myanmar nu cu fale zohkhenh ning cawnpiaknak ngeih a si lai i cu hnuah an innchungkhar bawmhchanhnak a herhmi pawl zong nawlngeitu hna nih ceihhmaipiaknak an ngeih lai tiah Atchara nih a chim chih.

Ref: ANN/The Nation