Myanmar Palai U Htin Lynn Nih Rakhine Kong Ah UN Lutlai Hmanmi Biafang Alnak A Tuah

Rakhine

UN lutlai nih Rakhine ramkulh buaibainak kong a chimnak ah a hmanmi biafang pawl kong he pehtlai in Myanmar aiawh in thlahmi UN palai U Htin Lynn nih alnak a tuah tiah theih a si.

‘Minung ciruang dohnak sual’ le ‘miphun tenau cihmihnak’ a si tiah UN lutlai Zeid Ra’ad Al Hussein nih Geneva ah tuahmi voi 36nak UN Human Rights Council ah Rakhine chung tukdohnak kong a chim lioah hmanmi biafang hna cu a sining taktak lengin hmanmi biafang an si tiah U Htin Lynn nih alnak a tuah.

 “Hi biafang hna hi phung ning le biaceih zung phakpi tlak in biaceih dingah a fekmi le a lang taktak thil lawngah hman khawh dingmi biafang an si”, tiah U Htin Lynn nih a duhlonak bia a chim.

 “An chim bantukin hi bantuk phungbuarnak le puarhrannak hi zaukphung zulmi Myanmar nih a tuah bal lai lo.”

“Atu bantukin a fekmi hrihram le tehte um loin biafang hmannak nihhin UN riantuannak ah zumhtlak a sinak hi a zorter lai, dohnak mei zong a alhter chin lai i miphun karlakah ralnak zong a karhter lai, cun a ping in ramchung ramleng mi hna a hruai hna lai”, tiah Htin Lynn nih a chim.

 “Arakan Rohingya Salvation Army (ARSA) nihin ramthumnak ah kalnak lam a um lai tiah ruahchannak an pek hna i an mi pawl cu an inn le an lo in an chuahzaamter mi hna a si”, tiah a chim fawn.

Cun, Kofi Annan nih Rakhine Ramkulh chung buaibainak daihter dingin a chimrelmi hna zong tuahzulh dingin Myanmar cozah nih aa zuam lio a si ko tiah Htin Lynn nih cun a chim than.

Myanmar cozah nih ARSA cu ralhrang phu an si tiah thanhnak a tuah cang hna, cu ARSA nih Aug 25 in tukdohnak an tuah hnuah Bangladesh ram ah Rohingya 400,000 deng cu an zaam cang hna tiah UN thawngthanhnak in theih a si.

Ref: The Irrawaddy