Myanmar President Ah U Win Myint Thim A Si; Pu Henry Van Thio Cu Thimfung 18 Lawng A Hmu Kho

President

Myanmar Ramkomh Parliament nih President U Htin Kyaw cu a rian in aa dinh caah president thar thimnak cu nihin ah an tuah than i Lower House Speaker hlun U Win Myint cu president ah thim a si cang.

Thimfung thlatu minung 636 chungin minung 403 nih U Win Myint an thim, minung 211 nih U Mying Swe an thim, cun minung 18 nih U Henry Van Thio an thim caah thimfung tambik a hmutu U Win Myint cu a pahranak Myanmar President ah cohlan a si.

Thimfung 4 hi hnonmi a si i State Counsellor Aung San Suu Kyi le cheukhat ramkomh minister hna cu thimnak ah an i tel ve sawhsawh ko nain thimfung thlaknak ah telh an si lo.

Caan karlak president (acting) rian a tlaimi U Myint Swe hi ralkap bawi a rak si bal ruangah ralkap lei parliament chungtel 162 dihlak le atu lio cozah dotu USDP lei in parliament chungtel 40 leng nih tanpi dawh a si.

 “Thimfung tambik a hmutu U Win Myint cu president ah thim le cohlan a si cang”, tiah thimfung thlakmi relnak a dih hnuah Ramkomh Parliament Speaker U Mahn Win Khiang nih thanhnak a tuah.

U Win Myint hi Lower House Speaker a si ko nain March 21 ahkhan U Htin Kyaw aa dinh ni ah president cuhnak ah aa tel khawhnak ding caah a rian in aa dinh ve hi a si.

U Win Myint hi Irrawaddy, Danubyu ah 1951 ah a rak chuak i Yangon University ah Geography in siangin a rak dihmi a si i cu hnuah 1980 kum hrawng ahkhan Law (upadi) a rak kai than.

Kum 67 a simi U Win Myint hi NLD chungtel upa vialte hna lakah Aung San Suu Kyi nih a tlaihchan bikmi le a uar bikmi a si tiah zumh a si. Amah hi February 2016 in khan 2015 ram pumpi hruaitu thimnak ah NLD nih teinak a hmuh khan Lower House lutlai ah a cang.

Lower House lutlai a tuan chungah U Win Myint hi dingrep (siikaan) a ngeihnak cungah a min a thang ngai.

Parliament tonpumhnak ahhin ceihhmaimi tlangtaar leng pial in biachim hi a duh bak lomi a si i ralkap lei in si hna seh, adangdang Union minister hna zong hi tlangtaar leng pet in bia an chim ahcun aa thuat lengmang hna ti a si.

Ref: The Irrawaddy/Mizzima