Myanmar Ralzaam Camp Mincim In Minung 1 A Thi; 7 An Tlau

Ralzaam

Zarhpi zaan ahkhan Thailand ram chung Myanmar ralzaam pawl dornak hmun (refugee camp) pakhat ah nawncek mincim ruangah minung pakhat a nunnak a liam i minung pasarih an tlau tiah Karen Refugee Committee (KRC) nih The Irrawaddy thawngzamhbu sinah an chim.

Ruah faak tuk in a suur ruangah vawlei he lung he cawh in Thailand le Myanmar ramri pawng, Mae Sariang chung Mae La Onn ralzaam dornak hmun (camp) ah zinglei sml 6: 30 hrawngah nawncek bak in min a cim i minung pakhat a thi i pasarih an tlau tiah theih a si.

“Nizaan ahkhan faak taktak in ruah a suur. Thaal caan ahhin tivate hi an kang tawn. Cu tikah ruah a suur caan ahhin tivate cu a luang lai tiah hohmanh nih an ruat lo. Ruah lo piin tivate cu a lianh tikah minung pariat a fenh hna. Minung pakhat i a ruak lawng kan hmuh”, tiah KRC chairman Saw Robert Htwe nih a chim.

Bangkok Post nih an tial ning ahcun a nunnak a liammi hi kum 2 ngakchia nute a si tiah an chim.

Atu i a cangmi nawncek mincim nih ralzaam camp chung inn 12 a hrawh, cun, minung 16 hliamhma an tuar. Hi hna chungin minung 13 hi sizung ah thlop liopi an si tiah Saw Robert nih cun a chim.

“Cheukhat cu an inn he hmunkhat ah mincim nih cun a kalpi hna. Nawlngeitu hna le NGO pawl nih khamhnak/bawmhchanhnak an tuah liopi a si. Mae La Oon ralzaam camp chungah atu bantuk faak in mincim hi a um bal lo”, tiah Saw Pwe nih a chim.

Hi ralzaam dornak hmun (camp) hi 2004 ah rak onmi a si i Myanmar ralzaam 10,000 hrawng an umnak hmun a si, a tam deuh cu Myanmar ralkap le Karen National Union (KNU) karlak tukdohnak ruangah a zaammi Karen miphun an si hna.

Ref: The Irrawaddy