Na fale Na Cawnpiak Hna Lo Ahcun Kan Miphun An Zuar Lai

June, 2010|| Kuala Lumpur || US ram State pakhat i sianginn cachim nu nih UNHCR Kuala Lumpur zung ah ca a rak tial. A ca tial mi cu Chin miphun hi ralzam an si lo ti a si. Zei ca dah mah ca cu a tial hnga tiah hlethlainak an tuah tikah an hmuh mi cu mah sianginn ah hin Kawlram mi sianghngakchia tam ngai dawh an si.

Mah sianginn ahcun kan mah Chin mi hngakchia nih kan hawikom a si mi Karen miphun hngakchia hna hi an zomhteih hna i an nek ngai hna an ti. Voikhat cu kan fa nau le Karen hngakchia hna cu bia an el le mah ahcun kan fanau le nih kan nih cu ralzam kan si lo. Hakha khua hmanh ah teih inn dot thum kan ngei. US kal kan duh tuk caah ka pa nih lih a chim i Malaysia in US kan phaknak a si. Nan nih cu khuate um mi miphun, zei thei lo nan si. US nan phak ah nan bel le kheng tiang nan i ken tiah an ti tik hna ah an celh hrimhrim lo i an saya te sin ah ripawt an tuah. Tha tein an hal tik hna ah Karen fanau le nih cun kan mah Chin hngakchia nih an ti ning tein an chimh hna tikah an saya te cu an hnakruh a tam hna i an ngeih a chia tuk caah an tap dih ti a si.

Mah vial cun a dih rua lai ti nak lak an saya te cu an i ceih cikcek dih hnu ah Kuala Lumpur i Ralzam zohkhenhnak zung pi ahcun mah “Chin miphun hna hi ralzam an si loh” tiah ripawt ca an rak tial.

Mah nih a kan cawnpiak mi cu innchungkhar ah duh tawk in mikong kan ceih mi le mi nautetnak kong kan chim mi hna hi kan fanau le nih an lungthin ah an i seh chih i nan theih kar lo ah mah thlaici chia cu leng ah a lang theo.

Biahalnak,

1. Na fa le hi ramthumnak na phanh pi hnu hna
ah ralzam kan sinak kong na cawnpiak bal
hna maw?

2. Khrihfa upa si le Community upa si lawng
hna ah na buai sual maw?

3. Na fa le hi tha tein na cawnpiak hna lo
ahcun na innchungkar nun ning in an
thancho lai ti hi na fiang maw?

4. Na fa le that lo le sual ruangah na pastor
hna lawng sual na puh sual maw?

5. Camping le crusade uar tuk tung i fa le sin
ah Khrih nunnak langhter khawh lo le
cawnpiak khawh lo ahcun kan fa le hi
miphun zuartu an si lai ti hi na thei cang
maw?

Catialtu: Saya Sang Hre (Australia)