Ngakchia Thluak Sining

Ngakchia Thluak Sining

 

Ngakchia Thluak Sining

Thir hi a linhsat lio lawngah duh ningin fawi tein den khawh a si bantukin fale hi an ngakchiat lio tein sersiam an hau

Minung kan thluak hi hraap hnih in a um anti. Orhlei hraap le kehlei hraap in a um. Orhlei hraap le kehlei pum hi ai pehtlai i, kehlei hraap le orhlei pum hi ai pehtlai ai pehtlai ve. Orhlei hraap hi pa nih an hman deuh i, kehlei hraap hi nu nih an hman deuh ve. Tluak cells hi nuai tampi a um ti a si i, nu nih naupawi lio thla nga si ahhin cu thluak cells cu 100 a um cang. Fa le hi an chuah in kum 2 an si ahhin thluak tthan a ran cem caan a si. Kum 6 tiang ahhin ngakchia thluak hi upa zat dengmang a si cang i, thluak a tling dengmang cang. Cu caah kum 8 tang ngakchia tha tein zoh khenh hi a biapi taktak mi a si. Cu thluak cells pawl cu an rian ai lo cio lo i hman loin um ahcun kum 2 ahhin a thi. Ci le kawr in thluak a nuar deuh mi cu um a si nain țha tein bawmh ahcun a țhangcho kho mi a si ko. Nau pawi lio ahhin nu le nih Baibal relpiak le hla sakpiak, muai le biaruah hi a biapi tuk mi a si caah ram țhangcho mi ahcun nu nau a pawi mi pawl hi Sunday School an kai an ti.

Kehlei thluak ahhin holh khawhnak hi a um ti a si i nu hi pa nak in an holh kho deuh an ti. Pa an orhlei pum a thih ahcun an kehlei thluak rian a tuan lo caah a si i an holh kho ti lo. Nu cu an orhlei pum a thih zongah an holh kho. A ruangcu nu pawl hi thluak pahnih ai tonnak an cal a hnu lei te ah khin holh khawhnak thil pakhat a um chih caah a si an ti. Pa nih rian pahnih kemh ai harh deuh i nu cu rian an țuan pah buin thil dang an tuah kho ti a si.

Minung kan thluak hi cet he tahchunh a si. Cet cu a cet lio ah cun kan duh mi paoh kan ser khawh. Nain a ro hnu ahcun zei hmanh kan ser kho tilo. Kuai lawng a tang ko cang. Cu caah kan fa le hna hi an no lio tein Pathian bia he cawnpiak an hau. Cun arleilit he tahchunh a si fawn. Arleilit cu ti chungah a um i, a cawl pengmi a si. Nain lungtekep te kan thlak hnawh hna ahcun an cawlmi kha hngap tiah an ngol. Cu ve bantukin kan fale hna thil theih an duh lio bik caan ah kan bengh hna an lu ah kan kingh hna ahcun hngap tiah an thluak ai din ve. Cu caah fale hi an lu ah kingh bak lo ding an si. Cun ngakchia thluak cu caku raang he tahchunh a si țhan. An theihhngan ah kan chimmi poh hi an thluak ah ai tial dih. Cu caah bia tha lo chim kha hrial i a thami bia chimh peng an hau. Cun lachon he tahchunh an si fawn. Lachon nih cun ti a dawp dih bantukin kan sining vialte hi kan fa le nih an kan dawp dih ve. Zohchunhtlak tein um piak an hau.

Cu caah cun kan innchungkhar cio ahhin kan fa le an sining hi theih thiampiak in Pathian bia in cawnpiak hi cu a herh bik mi a si ko. An no lio ah kan tha a baat deuh ahcun an upat tik ah kan lungre a thei ti lailo. An no tuk ko rih cuh tiin kan daithlan sual ahcun an upat tikah kan țhihruai kho ti hna lai lo. Ngakchia kong a hlathlai tu hna nih, kum 3 a simi nafa kha na cawnpiak khawh lo ahcun kum 13 a si tikah na cawnpiak kho ti lailo an ti. Cu caah Pathian bochan buin kan fale kha hram thuk piin kan bunhpiak hna an hau.

Phungthluakbia 22:6 ah kan hmuhmi cu “A zulh awk a simi lam kha ngakchia cu cawnpiak law, a upat tikah mah cucu a pialtak ti lai lo.” ti a si i kan fale hna an zulh awk lam a si mi Khrihfa phung cawnpiak le Baibal Tuanbia relpiak hi kan rian ngan bik a si ko. Pathian muisam keng in sermi, Pathian sin in kan hmuhmi rosung kan fale hna zohkhenhnak caah kan tha thu hrimhrim hlah usih.

# Ngakchia hna hi vawleicung rampi nih a ngeihmi hlawnthil a sung tukmi le hmai lei ca i ruahchannak tha bik an si. (John F.Kenedy USA President voi 35 nak 1917-1963)

Ch:
-Tenth Anniversary Souvenir
– Pastor Thla MengNgakchia Thluak Sining