Philippines Catholic Khrihfa Pawl Nih Thih Dan Peknak Kong Ah Duhlonak An Langh

Catholic Khrihfa

Zarhteni ahkhan Philippines ram Catholic khrihfa a thong leng nih an President Rodrigo Duterte tuahmi rithaisii hmang pawl thahnak kong ah lam zawh in duhlonak an langh tiah theih a si.

Hi duhlonak langhnak cu Manila khuapi chungah sianghleiruun siangngakchia pawl nih an ram president Duterte cung duhlonak an langhter hnuah a thaizing ah a si i cozah dotu Ferdinand Marcos ramleng ah thawl a rak sinak “People Power” timi dothlennak kum 32 tlinnak ni hlante ah a si.

Catholic khrihfa pawl nih cun lam cungah thlacamnak le hlasaknak an ngei hna, cun bishop hna nih cozah nih a tuahmi minung nunnak kong he pehtlai in an thil tuahmi le phunglam dohnak cathanh pawl nih an rel.

Catholic khrihfa hna nih cun “Minung Nunnak le Thianhlimnak Kilveng In Kilkamh Uh, Thahnawnnak Ngol Cang Uh” timi catar pawl an i put hna.

Rithaisii hmang pawl dohnak le thahnawnnak kong ah sualphawt a si ngai ko nain president Duterte cu khatlei kam in a minthang ngai i Southeast Asia ram chungah cun zumh ngaimi hruaitu pakhat in theih a si.

Philippines rammi a tamdeuh 105 million cu Catholic khrihfa an si hna. Rihaisii hmang pawl dohnak kong ah Duterte cu min a ngei ngai ko nain biaknak lei hruaitu tam deuh nih cun thahnawnnak le hremnak a tuahmi kong ah an lungtling lo ngaingai.

 “Thahnawnnak hi a um rih. Phunglam ning lo in thahnawn a tongmi an um timi thawngpang kan theih peng rih. Thih dan peknak kong hi Congress ah ceihchah rih lo cu a si”, tiah Bishop Broderick Pabillo nih a chim.

Duterte nih kan hnu 2016 June thla in president a tuan hnuah rithaisii hmang le zuartu minung 4,000 hrawng hi a thah cang hna tiah theih a si.

Ref: Reuters