Puai Le Buai

Puai le Buai

Puai Le Buai

Puai hi mitpur hnarcoih caah cun a nuambak. Puai hi pehtlai in um pengseh ti rumro duh asi. Puai tuahnak hmun i umkal cu a nuamtuk. Rianhrang ttuannak hmun um kal belte a nuamtuk lemlo. Uico lebang cu puai tuahnak hmun luhchuah, umkal cu an i phazo kho taktak ve. Pa Zai hrim khi puai tuahnak cu a theikho tuk. Puai timi cheukhat cu eidin he i pehtlai kaw Uico le Pa Zai hi an mawhlo. Ttuan loin sa ei cu a hlawktuk cu teh aw.
Lairam cu Khrihfa ram kansi. Cutik ah biaknak lei puai asi ah, vawlei lei puai asi ah Pathian sin thlacamnak te he puai hi on le thawk asi peng. Hihi thilttha cu asi. Tuahkho peng usihlaw a ttha hnga. Pathian sin thlacamnak te he thawkmi puai cu remnak, daihnak, buaibainak le i el hniarnak a um lailo, tihi kan i ruahchanmi cu asi. Cuticun puai cu tuah le hlawptlo ngai in caan hman cu asi phot. Hihi a luancia in nihin le hmailei pi tiang puai le thlacam hi i pehzulh dawh asi.

Puai hi zaanglek puai, nupi tthit puai, Miphun he ai pehtlaimi puai tiin a um. Cun X’mas, kumthar le thawhtthan tiin biaknak lei puai zong a um rih. Cun Jubilee puai, Hlasak puai, tbk in a tampi. Ka telhhrelhmi tampi a um rih lai. Puai hi eidin he ai pehtlaimi a tam deuh. Eidin he asi ah, eidin he pehtlai lomi asi ah, zuudin saei nih a tamdeuh cu a zulh ve. Puai cu zuudin nih a zulh tik ah thil a buaibai zungzal.
Puai tampi chungin zaanglek he ai pehtlaimi lentecelh phun paohpaoh ahcun teitu le a sungmi tiin um phung asi. Teitu si kan duhtuk lio ah sunghnak kan ton tik ah kan sining cungah lungtling loin kan ngaih a chia, kan lung a kuai i, buainak lam kan kawl. Pumpululh chuih le Paih zuamnak ah”tual upa nih kap ttanhmi a ngei” tiin kan vuivai, sonhtarhnak le buainak lam kan kawl. Cutik ah kan puai i 80% cu buainak in a dong zungzal tawn. Jubilee phun, Khua, Khrihfabu, tbk. Jubilee tuah tik ah khua tlatu maw, Khrihfabu mi hmasa timi Mekazin in kan chuah ah maw, lungphun cung cattial mi in maw, thawngthanhmi zawn in maw, “an ka telhlo, anih vial an telh. Zeidah kha vialte ka caan pekmi cu zei i an hei ka relpiak ve lo? “tiah lungfahnak le lung i hmuhlo nak le buainak a chuak lengmang. Ka theih a tam ngai, hikong hi.

Puai kan tuah tik ah Buai nih a zulhlomi hi a bengbai ngai. Eidin asi ah, Rawlcoih le coihlo, lolam kal thloh le thlohlo kong, saphawt hrelh le hrelhlo kong, buhtthing put lawipi le lawipilo kongkau tiangin buainak cu voizatpi. Pumpululh chuihnak ah ningchim Dainluci le lineman nih kan palhlomi, kan palh (false) lomi, kan tawnghlomi, a kawl komi…, cutin khatin an hei kan ti. Kan duhbaklo, tiah buaibai cu a tam taktak. Tukum hmun zeimazat zaanglek lentecelhnak CUP zongah buainak a um ngai. Cuhlan puai a dangdang zongah hin a tampi. Nuar i laksawng lak duhlo hna kan ton ttheu ko khah. Laimi kanti ahcun a kautuk sual lai. Halkha, Thantlang peng tutiang kan dirhmun tuanbia cuanh tikah Puai le Buai cu Zusa le Chihlaam bantuk in ai remtuk cang. Biaknak min in asi ah, vawlei lei in asi ah kan i thawknak cu Pathian sin thlacamnak te he asi peng nain, zohchia in puai cu buaibai ngaiin kan dihter pengmi hi ruah tik ah thinlung a nuamkho baklo. X’mas a nai ngai cang. X’mas lila zongah a buai le a aukhuangmi kan um len rihte lai. Nihchuak le ttahchuak kan tam ko. Puai hi buai loin a dihmi tuahkho dingah thlacam kan cah hna. Kan buai ding nakcha cun puai tuahlo hmanh hi a tthadeuh te lai. Puai cu lunghmui tein a dih khomi tuahkho dingin Pathian nih kan thinlung nunram hi kan thleng hraam cang ko seh.

Puai le Buai