Ralrin Ding! Thil I Hrawmnak In HIV Zawtnak I Chonh Khawh A Si

HIV zawtnak cu nu le pa pehtlaihnak (sex), thi rawnhnak le tthim hrawmnak lawng in i chonh khawh a si

HIV zawtnak

Atu tiangah kan hei theih ning cio ah cun HIV zawtnak cu nu le pa pehtlaihnak (sex), thi rawnhnak le tthim hrawmnak lawng in i chonh khawh a si ti hi a si. Asinain, hi lawng in si loin lam dang zong in zawtnak i chonh khawh a si.

Brazil ram nu pakhat, kum 20 cu thi hlut dingin timhlamhnak a ngei i an thi cu an check hmasa tikah HIV a ngei ti a si ko. A thi zoh tikah a tam zong a tam i a that zong a tha ko. Hi zawtnak hi zeitindah ka ngeih khawh, khua zei in dah kaa lak khawh tiah a khuaruah a har.

Cucaah, a nu zong a thi an check ve tikah HIV a ngei fawn lo. A liamcia kum 10 lioah a chungkhat unau nu pakhat he “tin remhnak thilri” an rak i hrawm kha a hun theih. Kha lio ahkhan a chungkhar unau nu hi tamhnak dawr (saloon) ah rian a rak tuan i HIV zawtnak a ngeih a rak i thei lo, nain a hnuah HIV a ngeih theih a hun si.

Hi hna chungkhar unau pahnih cu an thi an check ve hna tikah a langmi cu an thi umtuning bak hi aa khat ti a si. Cucaah, tin remhnak thilri i hrawmnak in hi zawtnak hi an i chonh tiah fianh a si.

Atu tiangah cun HIV zawtnak i chonh khawhnak lam asiloah thilri chungah tin remhnak thilri cu telh a si rih lo. HIV kong dothlattu hna nih HIV zawtnak hi pakhat le pakhat takpum i tawnghthamnak, kheeng le keu hrawmnak le ti dinnak hrai i hrawmnak in chonh khawh a si lo tiah an rak chim.

Sihmanhsehlaw, atu thil cangmi nih phundang ngai in HIV zawtnak i chonh khawh a si ti a langhter tikah a bik in nu hna nih midang he tamhnak thilri hmanti tikah an i ralrin deuh a hau cang ti a si.