Rex Tillerson Nih Rohingya Pawl Kong Ah Min Aung Hliang Phone A Chawnh

Rohingya

US Secretary of State Rex Tillerson nih Cawn Nilini ahkhan Myanmar Ralkap Bawizik Snr-Gen Min Aung Hliang cu Rohingya pawl kong he pehtlai in phone a chawnh tiah theih a si.

Rex Tillerson nih cun Min Aung Hliang sinah Rakhine ramkulh chung thil cang kong he ralzaam hna an harsatnak kong ah a lungnuamh lonak kong a chim i buaibainak aa pehzulh ti nakhnga lo chimhchawnhnak a tuah.

Cun, “Rex Tillerson nih cun Rakhine ramkulh chung remdaihnak a um nakhnga acozah he tan an laak dingah Myanmar Ralkap sinah forhfialnak a tuah, cun buaibainak in a zaammi ralzaam hna, a bik in Rohingya muslim pawl cu an innlo ah kirter than an si dingah forhfialnak a ngeih”, tiah State Department lei chimrel khotu Heather Nauert nih a chim.

A liamcia August thla dongh lai khan Rakhine ramkulh in Bangladesh ah a zaammi Rohingya/Bengali muslim hi 600,000 leng an si cang.

Rex Tillerson nih cun umnak ngeilo mihar ralzaam hna bawmhchanhnak zong lam kaupi in onh ding le zumhtlak in minung covo buarnak kong ah thil sining dohhlatnak zong ah ralkap lei nih UN he rian an tuan ding zong Min Aung Hliang cu a chim chih.

Cawn Nikhatni ahkhan US nih Myanmar ralkap bawi hna cungah phihkhamnak tuah dingin thanhnak a rak tuah cang lengah US tlawn dingin sawmmi ralkap lei bawi hna zong US tlawnnak a phih than hna.

Kan hnu zarh ahkhan Tillerson nih cun Myanmar ralkap hna hi cawnpiak le chimhhrinh hrimhrim an herh cang, atu bantukin nawlpuarnak a cangmi hna hi vawleipi nih dir sawhsawh in a zoh sawhsawh ti lai lo tiah ralrin peknak bia a rak chim.

Min Aung Hliang nih cun a ralkap cung sualphawtnak hna cu a si diklo mi an si tiah a al lengmang. “Kap khat lawng zoh in le tanh in Myanmar le a ralkap cungah sualphawtnak le thanhca an chuahmi hna hi a dik lo bakmi an si”, tiah Cawn Nihnihni ahkhan a Facebook cahmai ah a taar.

Ref: AFP