Rohingya Pawl Kong Ah Myanmar Ah Rex Tillerson A Tlawng Lai

Rohingya

Hmai zarh chungah US Secretary of State Rex Tillerson cu Myanmar ah a tlawng lai tiah US State Department nih an thanh. Rohingya pawl kong ah amah hi Myanmar ah a tlawngmi US cozah lei in bawi nganbik a si lai.

Tillerson cu November 15 ahkhin Naypyidaw ah Kawlram zaukphung thlennak kong ah US nih a tanpinak kong le Rakhine ramkulh chung buaibainak kong he pehtlai in biaruahnak a ngei lai tiah Tillerson chungtuan chimrel khotu nih a chim.

Tillerson cu Asia ram chung ram 5 ah President Trump a khualtlawnnak ah a zul hnuah Myanmar ahhin a tlawng pah chih te lai ti a si. President Trump cu Manila ah tuahmi US-ASEAN summit ah a kai chih lai ti a si.

ARSA ralhrang nih tukdohnak an rak tuahnak in August thla dih lai khan buaibainak a rak karh chin i cu hnu cun Rakhine ramkulh in Bangladesh ah Rohingya 600,000 leng cu Bangladesh ah an rak zaam hna.

Rakhine ramkulh chung tukdohnak kong ah US nih bia tak tein mawhchiatnak cu an langhter nain hi hnoksok kong ah Aung San Suu Kyi cungah si lem loin ralkap cung deuh tu ah sualphawtnak cu an rak tuah.

Tillerson nihhin Rakhine chung ah mi bawmchantu hna le thil sining dothlattu hna cu zalong tein rian an tuan khawh nakhnga ralkap sinah nawl halnak a rak tuah len cang.

Ralkap uknak in mipi duh in thimmi cozah uknak cu 2010 khan Myanmar ah thlennak a um kho i Aung San Suu Kyi hi Prime minister dirhmun bantuk State Counsellor ah a hung cang nain a nawlngeihnak hi a tlawm ngaingai.

Thil sining ngiathlaitu hna nih mi thawngtha/nawlngei ralkap bawi pawl le an hawile mirum pawl ral a tih ruangah ralkap pawl hi Aung San Suu Kyi nih an soisel/mawhchiat ngam hna lonak hi a si tiah an chim.

Ref: AFP