Sahdah Le Khaini Kong Ah Australia Um Chinmi Hna Sin Ralrin Peknak

Khaini

India le Malaysia lei in Australia ram ah sahdah/raja, kunpawng, kuak le khaini tibantuk zukhmawm awk pawl tampi hi Chinmi hna sinin a phak lengmang caah Australia Lah-wah-kah Zung (Department of Border Protection) nih ralrin peknak an tuah tiah theih a si.

Hi kong he pehtlai in Australia Chin Community- Eastern Melbourne (ACC-EM) nih a tanglei bantukin Chin miphun hawi hna sinah theihternak le ralrin peknak an tuah.

Ralrin peknak 
************

Naiten a phanmi Laimi hna sin ah “sadah le khaini tam tuk an tlaih hna caah Dept of Border Protection an thin a hung tuk i Settlement Services a petu AMES sinah ralrinnak an pek hna. Cucaah AMES lutlai te nih Nichuahlei Chin Hakha Community hrauitu pawl cu tonnak a kan ngeih.

Atu bantuk in India lei le Malaysia lei in khammi thil a si mi kunpawng, sadah, kuak le khaini tbk an phurh ahcun Dept of Border Protection nih direct in tazacuai an tong lai i tihnung mi thil a chuah khawh caah rianrang tein ralrin a kan pek hi a si.

Cu tbk khammi thil kan phurh ruangah Airport ah Kawlram mi ralzaam in a rak phan mi paohpoah a hleice in check le kherhlai an tuah cang nak zong thawng a kan thanh chih.

Cucaahcun, Cozah nih duh lo mi thil tuah hi kan community chungtel dihlak nih nan hrial awk a si. A rak phan thar mi hna hi zei hmanh an thei lo. Chungkhat, hawikom le nih cah mi lawng te a si ti hi a kan chimh ning a si ca’h ralrin taktak kan hau. Post in a cah tawnmi le a zuarmi hna zong ralril ngaingai kan hau hna.

Hmailei ah kan Miphun caah thil thalo taktak a chuahpi kho mi a si cang. Cucaah Media tiang nih ah kan chuah ahcun thil pipa a chuahkawh caah Community lei in fak taktak in tuanvo kan lak cang lai ti zong thawng kan in thanh hna.

Miphun dawtnak he,

ACCEM