Shan Ramkulh Ah Tlaihhrem Le Lainawn Sual In Minung 2 Cu Thihdaan Pek An Si

Thihdaan

Cawn Nikhatni ahkhan Shan Ramkulh ah biaceih zung pakhat nih taang 10 aa kai liomi siangngakchia nute an tlaihhrem i an thah ruangah pa pahnih cu thihdaan an pek hna tiah palik bawi pakhat sinin theih a si.

Soe Lwin, kum 40 le Sai Shing, kum 29 cu Shan Ramkulh, Kengtung peng biaceih zung nih siangngakchia nute an tlaihhrem i an thah ruangah le a ruak an khangh ruangah phungbuarnak pahnih in tazacuai le sual biathlehnak tuahpiak an si.

“Biaceih zung nih thihdaan an pek ko hna, anmah zong nih an tlaihhremnak kong le an thahnak kong he pehtlai in an sualnak an phuan”, tiah Kengtung i palik bawi Aung Moe Khaing nih a chim.

Tlaihhrem le thah a tongmi siangngakchia nute, Aye Pi La cu Lahu miphun a si i December 2017 ahkhan tlaihhrem le thah a rak ton hi a si. A ruak cu Kengtung motor lampi pawng ah mei in an rak khangh.

Aye Pi La i a tlangvalpa nih a kutdonghrolh in thah a tongmi a nungak (Aye Pi La) cu a theih khawh i cu hnuah palik sinah report a tuah i Soe Lwin le Sai Shing cu tlaih an rak si.

Hi hna pahnih ( Soe Lwin le Sai Shing) nih cun Aye Pi La nih kan sinah tangka an rak kan cawi, asinain chap than a kan duh lo. Cu ruangah zu kan rit lioah atu bantukin ka tlaih i kan thah hi a si tiah biaceih zung ah an chim.

“Hi hna pawl hi aa theihhngalmi an si. Tangka kong ah buainak an ngei i si ko. Pa pahnih nihhin zei poah va si ko seh tiah zu an rit lioah Aye Pi La hi an rak tlaih i an rak thah hi  a si”, tiah palik bawi Aung Moe Khaing nih a chim.

Hi hna pa pahnih hi thihdaan cu pek an si ko nain Myanmar ah 1980 kum hrawng khan misual thihdaan peknak taktak an tuah hi a um rih lo tiah Amnesty International nih an chim. Cun, thihdaan luat dingin Myanmar president sinah nawlnak/ngaihthiamnak an hal khawh rih.

Ref: The Irrawaddy