Thaizing Thawk In Malaysia Ah Ramdangmi Tlaihkhihnak Thawk A Si Than Lai

Phungninglo Ramdangmi

August 31, Cawn Ningani in Malaysia Immigration zung nih faak taktak in phungninglo ramdangmi hna le minung chawlettu (hmawngkhu) pawl tlaihkhihnak an thawk cang lai tiah Datuk Seri Mustafar Ali nih a chim.

.Atu tan tlaihkhihnak ahhin minung cawzuartu/chawlettu (hmawngkhu) pawl hi a hlei in tlaihkhih an si lai tiah Immigration director-general Datuk Seri Mustafa Ali nih cun a chim chih.

“Hi hmawngkhu pawl hi rian hmun pakhat ah riantuanter hna dingin ramdangmi riantuantu pawl cu ram chungah an luhpi hna nain hmun dangdang ah rian an tuanter hna”.

“Jalan Masjid India ah naite ahkhan hmawngkhu riantuan pakhat kan tlaih, cu ka hmun i riantuantu pawl cu an riantuannak ding hmun ah tuan lo in hmun dang tu ah an tuan”, tiah Mustafar nih cun a chim.

Hi phungninglo ramdangmi tlaihkhihnak hi ramdang palai zung (embassy) hna le adangdang zung pawl he i pehtlaih in tuah a si lai tiah Mustafar nih a chim.

“Phungninglo ramdangmi ahohmanh an luat lo ding hrimhrim in khua chung riantuantu zung hna he rian kan tuanti lai. Riantuantu bu vialte hmun khat ah fonh in riantuan hi a biapi ngaimi a si” tiah Mustafar nih a chim.

Riantuantu bu kip he riantuan ti hi a biapi ngai, zeicahtiah a hlan i tlaihkhihnak kan rak tuah ahkhan UNHCR he rian kan tuanti tikah UNHCR Card deu aa tlaihmi cheukhat zong kan rak tlaih khawh hna tiah Mustafar nih a chim fawn.

2014 in tu kum August 28 tiangah 3+1 (Tlun/kir thannak catlap) a sok i an ram ah a kir thanmi phungninglo ramdangmi hi 867,336 an si. Cun, tu kum chungah Jan 1 in Aug 29 tiangah Immigration zung nih voi 9,449 tlaihkhihnak an tuah, minung 116,270 hi an check hna, hi chungah 29,040 hi tlaihkhih an si cang.

“Tlaihkhihmi ramdangmi hna hi Indonesia rammi an tambik i minung 9,759 an si, changtu ah Bangladesh (5,959), Philippines (2,820) le Myanmar (2,715) an si”, tiah Mustafar nih a chim.

“Aug 30 leng hin cun a ni kan sauh khawh ti lai lo, Aug 31 thawk cun Malaysia ram pumpi ah phungninglo ramdangmi tlaihkhihnak tuah kan thawk cang lai”, tiah Mustafar nih a chim chap.

Ref: The Star