Thawngtha Chim Minthang Rev. Billy Graham A Nunnak A Liam

Billy Graham

US ramhun cheukhat le American mi thong tampi i thlarau lei pa a simi thawngtha chim Rev. Billy Graham, kum 99 cu Cawn Nithumni ahkhan hi vawlei nunnak in a liam cang tiah theih a si.

Jimmy Carter in Donald Trump tiang US ramhun hna nih Billy Graham a thihnak cungah an ngaihchiatnak le an thangthatnak an langhter hna.

 “Kan Pabik Billy Graham a thi. Amah bantuk ahohmanh an um lo. Khrihfa hna siseh, biaknak dang vialte hna nih a zuun an tuar cio lai. Khuaruahhar pasaltha a si”, tiah President Donald Trump nih a tial.

 “Billy Graham hi America ram tuukhal (pastor) a si. Khrih a zumhnak le a thawngtha chimmi nih vawleicung minung tampi a thangphoh hna. Mitha pakhat a si bantukin Khrihfa hna thinlung lawng si loin biaknak dang hna thinlung zong a tawngh hna tiah ka ruah”.

“Pumpak hawikom pakhat in theihhngalhnak ka ngeihmi zong hi thluachuah taktak a si. A hlan lio US ramhun hlun ka fapa telh in ka fale hna cawnpiaktu pakhat zong a si. Kan chungkhar nih a zungzal in kan ngai lai ee”, tiah president hlun George H. W. Bush nih a chim.

Billy Graham hi Bush chungkhar he aa naihniam ngaimi an rak si i George W. Bush nih 1985 ah Billy he pumpak biaruahnak kan rak ngeih hnuin zudin zong ka rak i phiat tiah a chim.

Harry Tuman in Barack Obama tiang US president pawl hi Billy Graham nih thawngtha a rak chimh cang hna. Asinain, President Jimmy Carter lawnglawng hi biatak tein zumhnak a dirpimi a si tiah Graham nih a rak chim.

 “Billy Graham hi ka thlarau lei nunnak lam a ka hruaitu a si. Bat hngal loin ruahchannak le lungrualnak thawngtha a chim i vawleicung minung thong tampi nunnak a sersiam”, tiah US president hlun Jimmy Carter nih a chim.

Billy Graham a thihnak kong cu Billy Graham Evangelistic Association nih nizaan ahkhan thawngthanhnak an tuah. Billy Graham hi Nov 7, 1918 ah Charlotte, North Carolina ah a rak chuak.

1934 ah nun thlennak a rak hmu i atu i Trinity College of Florida tiah auhmi Florida Bible Instute ah cawnnak a rak kai i 1939 ah Baptist pastor ah rak khanh a si.

1950 ah Billy Graham nihhin Billy Graham Evangelistic Association (BGEA) cu Minnesota ah a rak dirh i “Hour of Decision” timi zarh tin chuak radio program a rak tuah. Amah hi 1950 in radio le TV cungin thawngtha a chim hmasatu le thlarau tampi a rak tlaitu a si.

Billy Graham hi US president tampi i thlarau lei pa le ruahnak petu zong a si. President George H.W. Bush chan lioah hin White House ah 1991 ahkhan thlacam pumhnak amah hi rak sawm a si.

Graham le a nupi Ruth Bell Graham nihhin fa 4 an ngeih hna. An fale hna chungah Anne Graham Lotz le fapa pahnih hna cu pastor an tuan. An fapa William Franklin Graham hi atu ah Billy Graham Evangelistic Association hi lutlai a si.

Billy i a nupi Ruth cu kum 64 deng tiang vawleicung minthang Baptist thawngtha chim he hmunkhat ah an um ti ko nain a thih tiang Presbyterian a si peng. A nupi Ruth cu June 2007 ahkhan kum 87 a si ah a rak thi.

Billy Graham nih bia roling a rak chimmi pakhat cu ‘ka hnangamnak nganbik cu Khrih ta ka si, zeipoah cang ko hmanhsehlaw, Khrih nih zeitik hmanhah a ka hlaw in a ka kaltaak bal lai lo. Hi vawleicung ka um chung poah keimah he a um lai i, ni khatkhat ah vancung ram ah zungzal Amah he umti dingin ka kal te lai. Cu ni cu kaa hngahchan’ ti a si.

Ref: AFP/SBS