Rili Cungah Ngakchia 22 Telh In Rohingya 56 Tlaih An Si

Rohingya

ALOR SETAR. MALAYSIA: Nizaan tihni zing ahkhan Malaysia nawlngeitu hna nih Langkawi pawng rili cungah tilawng pakhat chungah ngakchia 22 telh in Rohingya ralzaam 56 an kham hna i an tlaih hna tiah theih a si.

Malaysia Ti Lei Ralkap Zung in pengkulh director Rozali Mohd Said nih nu ngakchia 19 le pa ngakchia 8 an si i adang hna cu upa an si hna, nu 17 le pa 19 an si tiah a chim.

Zinglei sml 9: 30 hrawngah Lawngkawi, Pulau Tuba pawng ah an i citmi tilawng kan tlaih hi a si. An tilawng citmi hi a liamcia ni hnih khan Thailand lei in a rak i thawhmi tilawng a si tiah Rozali Said nih cun a chim chih.

 “Ralzaam pawl cu a herhmi eidin le sii-ai pawl kan pek hna. Cun, Kedah Immigration Zung ah an hren chung hna. Malaysia ah ti lam in phungninglo in luh hi a ngah bak lomi a si. Ralzaam pawl hi zawnruahnak in eidin le sii-ai pek hi an si”, tiah Rozali nih cun a chim fawn.

Kedah Immigration Zung nih hi ralzaam pawl vialte cu Anak Bukit Immigration Zungpi ah an kalpi than hna. An zapi tein Belantik Immigration centre (ramdangmi hrennak thong) ah kuat an si than te lai tiah Kedah Immigration zung director Zuhair nih a chim.

Ref: NST