Trump Le Kim Jong Un An I Hrocer Ning A Faak Chin Lengmang

Kim Jong Un

US President Donald Trump nih North Korea hruaitu Kim Jong Un le Foreign Minister Ri Yong Ho cungah Tweeter in tlerhnak ca a tial than.

President Trump nih cun ‘Little Rocket Man’ (Kim Jong Un) i a ruahning hi Ri Yong Ho nih a kalpi ahcun an pahnih in “caan sau an um ti lai lo”, tiah a chim.

North Korea Foreign Minister Ri Yong Hu nih a liamcia Zarhteni ahkhan United Nations General Assembly (UNGA) ah ‘khuachia pa (Mr Evil President)’ Trump nih Kim Jong Un cu ‘rocket man’ tiah a auhhnawh caah kan rocket in US ram hmunpi kah timhnak cu hrial awk tha lo a si cang tiah a chim.

Atu bantukin Ri Yong Hu nih bia a chimmi kong ah, “UN ah North Korea Foreign Minister biachim kha theih a si cang, Ri Yong Hu nih ‘Little Rocket Ma’ (Kim Jong Un) ruahnak a aupi ahcun caan sau an um ti lai lo hih!” tiah Trump nih Tweeter in lehnak a tial.

Trump le Kim Jong Un nih pumpak in an i tihnawhnak/entainak le an i tlerhkhonhnak hi a faak chin lengmang cang. North Korea nih US phan kho ding nuclear/missile bomb ser ding cu aa zuam peng ve bantukin Trump nih cun i venkham dingin biatiamnak a chim ve.

Cawn Ningani ahkhan Kim Jong Un nih Trump cu ‘lung lei tlamtlinglo US tarpa’ tiah a auh ve i ngam lakin meiphu in ka chimhhrinh lai tiah a ti.

Kim Jong Un nih atu bantukin bia lehnak a tuah hi Cawn Nilini, UN bia a chimnak ah Trump nih North Korea hrawhhral dih dingin tlerhkhonhnak bia a chim hnuah a si.

North Korea nih September 3 ahkhan a voiruknak, a tha thawngbik nuclear bomb hneksaknak a tuah kha a si i UN nih hi ruangah phihkhamnak an rak tuah chap kha a si.

North Korea nih cun Cawn Ningani ahkhan Pacific Ocean (Rilipi) cungah hydrogen bomb hneksaknak tuah dingin an chim fawn.

“A faak deuhmi phihkhamnak ruangah North Korea hi lehhmah pakhat hmanh aa ther in a dirhmun aa thleng men tiah ruat lem hlah uh”, tiah Ri Yong Hu nih Zarhteni ahkhan UN General Assembly ah a chim.

Bomb thlaknak US Vanlawng Ralkap B-1B phu le adangdang vanlawng hna cu Zarhteni ahkhan ralkap thazaang hmuhsaknak caah North Korea nichuahlei rili cungah an zuang hna.

Ref: AAP