Ttihzia Thiam Usih

Ttih Zia Thiam Usih

Ttihzia Thiam Usih

Zeithil paoh hi a ttha kan tuah le kan ruah ah, a tthalo kan ruah le kan hrial ahhin a zia thiam a herh. Kan thinlung nih thil pakhat a duhtuk tik le a huattuk caan ah a zia thiamlo ahcun mualpho a fawituk. Kan ttihmi hi kan ttihpat ti ah le kan ngamhmi hi kan ngamh ai pat tiah a tawkzawn theihlo, a zia thiamlo ahcun zeihuaha lo ah mi hmai khaap loin khuasak a fawite.
Muithla/mithla hi Laimi cu kan hmu khunrua kati. Akong chimphai le midang tthihphaih hrim kan huam in kan thiamtuk. Mithla thawng ka theih, mithla ka hmuh, tihi a chimmi kan tam ngaite. Saarthi an um tik ah, cu zan khaka zawn ahkhan cutin mithla nih a ka tthih,tbk hi kan chimngai. Ningttih theilo vialte ningttih pang viar in an kan tuah. Ningttih kan hman dih cang tik ah khuamui, khuaceu huallo bak in kan ning a ttih. Cu tik ah ningttih kongkau ahhin ttihzia hmanh kan thiam tilo i, ttihlo dingpi tiangin kan ttih dih cang. A ttihvemi hraat cu ‘ttih hlah’ ti awk cu an tthalo nain, a tawk le a zawn cu theih a hauko ti hi ningttih kongah langhter ka duh.
Ttihnak kongkau chim tik ah a zia thiam a hau ticu a fiang ko. Ttihnak nihhin minung ca zongah thilttha tampi a chuahtermi a tampi ve bantuk in thil tthalo zong tampi a chuahter ve.

Ttihnak hi phunhnih in tthenkhawh asi. Ttihnak ttha le ttihnak tthalo tiin. Ttihnak tthalo nihcun minung chan a tawiter i, kan ral a kan chiatter dih tawn. Ttihnak ttha nihcun kan nunnak a kilven i, nun himnak a kan pek. Cun lungdaih hnangamnak zong kan hmu. Zawt hi kan ttihtuk caah kan i ralring i thilttha a chuak. Kan i ralrin bu ko ah kan zawtcaan a um tthiamko. Sihmanhsehlaw kan i thlop bul ahcun kan dam tawn ko. Cheukhat cu zawt te hna ka ttihlo tiin duh in an tlong nain a zawlo tawk tampi an umve.
Thomas Alfa Edison hi muihnak a ttihtukmi asi. Cucaah ceunak chuahpi dingin khua a ruat i, Electric Bulb a serchuah ve. Mui ttih hna hi thilttha chuahpitu a rak si. Ralpi pahnihnak kha ttih a nuntuk caah raltuk zorternak ding tuaktannak a chuak i, atu i UNO khi dirh asinak asi.
Ttihnak tthalo nihcun thilttha asi ti theihkomi hmanh tuah ngamlo ralchiatnak thinlungput a chuahpi. Cunih ttumchuknak le minung hawi nun canhlonak a chuahpi ve. Ramtang le buur lak ah Rul a um ti i ttih cu rulcuk in kan him. Sinain khuachung zalam pi cungah rul a um lai, tiin ttih i lenvah ngamlo cu zoh a chia, hruhcoh lawng i huahnak asi. A miaklo. Laimi hi biasiphai kan hmang tuk. Asi kholo rumromi zong asi khoding in kan chimhuam i, asi kho bak komi zong tuah ngamlo tiangin kan caih kho. Lai pupa phungthluk pakhat ah “forh fawforh ah naam kiak tu, phaih phaphaih ah ngalkiak zaam “timi a um. Forh kan ol tuk. Ttih kan ngeilo. Tthihphaih nih kan fawituk hoi i, tlukrilh lai ruatlo tiangin kan ttihmi zawn ahcun kan tli kan zaam fawn.

Sipuazi tuah cu an chim ah kan lung a tho khotuk cio. Vanchiat ah tlaihkhihmi hna dirhmun le sunghnak an tonmi hnihkhat kan theih ah kan ttih. ” Ka sung sual lai ” kanti i, kan i ngol diam ko. Amiak hmuh cu kan duh i kan ngamhtuk nain, sungh suallai phan ah kan i ot ngam tilo. Sipuazi timi ahcun raltthat a hau. Ttihnak thinlung he cun a dihdongh tiang thil hi kalpi khawh asi lo. “Kalpi ko seh, a rak kir tthan ko lai” timi ruahnak he lungput pical ngeih lawngah rian hi pehzulh ngam le hlawhtlin a si tawn tihi a ziathiam a hau.

Miphun dang ttih tuk le uar tuk zong hi thiam kan hauko. Lainu nih Kawlpa uartuk i Laipa cu hrialdeuh tbk hna hi kan i ralrin a hau. Kawlpa na uar le na ngamhtuknak nih khan a huaha lo ah lakfa an pawiter khawh. Laipa sin lakfa le Kawlpa sin lakfa kha ailo lailo. Uknak lei in Laipa bawi asimi ttihzahlo, zei i rel huaha lo i, Kawl bawi vial ttihzah le upat taktak. An chimmi paoh ‘hohkeh’ ti piak peng i Laibawi bia cu zei suauphaulo hna hi mahngallo ziaza asi. Kawlholh i a holhmi paoh ttih thlorh in ttih i, an hmai i kuun tuungmang tawn. Laipa nih Laiholh in asi ah kawlholh in asi ah a bia chimmi tthatthi hmanh in ngaihpiak huaha lo hna hi miphun cimihnak hrampi asi. Ttihding a um i, ngamhding a um. Thleidan thiam a hau. Suirong asimi paoh Sui asi lo. Eek zong asi ziar khoko. Cucaah ttihzia thiam Usih. Ngamhzia lila zong thiam usih. Thluak na ngeih ikpaak le Pathian nih chiattha thleidan thiamnak an pek kha nai theihko ahcun, khua hi ruahdeuh le thleidan thiam kanherh ko. Cuti locun hitin kansi peng ko lai.

Ttih Zia Thiam Usih