Tuzarh Cawn Nithumni Ah Myanmar President Thar Thim A Si Cang Lai

Myanmar

Kan hnu zarh ah ruah lo piin Myanmar President U Htin Kyaw cu a rian in aa dinh hnuah atu zarh Cawn Nithumni ahkhin Myanmar president thar thimnak cu tuah a sic ang lai tiah nihin ah Ramkomh Parliament (Union Parliament) nih an thanh.

Phunghrampi ning in Lower House, Upper House le rian ngeimi ralkap lei phungser tuanvo ngeitu hna nih president ah thim dingmi vice president pathum cu an thim cang hna.

Kan hnu zarh Cawn Ningani ahkhan Lower House nih an hlutdaw lutlai (speaker) U Win Myint (NLD party lei in) cu president ah chuahpi dingin vice president caah an thim cang i atu lio acting president (caan karlak president) a tuanmi U Myint Swe le U Henry Van Thio hna he president aa cuh lai.

Tu zarh Cawn Ningani ahkhan Parliament ah U Win Myint, U Myint Swe le U Henry Van Thio hna pathum chungin president caah thimfung thlak le thim an si cang lai.

U Win Myint cu U Htin Kyaw aa dinh ni, Cawn Nithumni ahkhan Lower House speaker rian in aa dinh ve tikah amah hi Myanmar president thar cu a si ko lai ti hi zumh a si.

Zumh ning bantukin a si taktak ahcun U Win Myint hi Myanmar Independence a ngah kum 1948 hnuin Myanmar president a pahranak a si lai.

The 67-year-old is believed to be one of State Counselor Daw Aung San Suu Kyi’s favorites among fellow senior NLD members. He became the Lower House speaker in February 2016, after the NLD won the 2015 general election.

U Win Myint, kum 67 hi NLD chungtel upa lei pakhat a si i State Counsellor Aung San Suu Kyi nih aa bochan ngaimi, a uar ngaimi NLD upa a si. Amah hi February 2016 ah Lower House speaker ah rak thim a si.

President rian in U Htin Kyaw aa dinhnak kong cu lenglei mipi hna caah khuaruahhar ngai a si ko nain NLD party lei nih cun hi aa dinh ding kong hi NLD chungtel upa hna le cozah hna karlak ahcun ceihhmai cangmi le theih ciami thil a si ko tiah an chim.

NLD chungtuan chungtel pakhat a simi U Win Htein nih cun Zarhteni ahkhan NLD CEC meeting ah U Win Myint hi president ah thim dingin ceih a si. U Htin Kyaw hi a ngandam lo ruangah a rian in aa dinh hi a si ko tiah a chim.

U Htin Kyaw nih cun aa dinhnak kong he pehtlai in a rian in dinh a duh ruangah ti lawngin thanhnak a tuah. A tak ahcun U Htin Kyaw hi Aung San Suu Kyi i a mi hmanmi menmen khi a si ko tiah zapi nih hmuh a si.

Kan hnu kum in khan U Htin Kyaw cu a mithmai, a cawlcanghning le cheukhat rian herh ngeihnak ah a bau pah lengmangnak zoh tikah mipi nih a ngandam lo hi an theih cang ko. Ramleng zong ah i thlopnak a ngei fawn.

U Htin Kyaw i a nupi Daw Su Su Lwin nih cun, a vapa U Htin Kyaw a rian in aa dinhnak a ruang hi a ngandam lonak ruang lawngah a si lem lo, i dinh ding hi a hlankan tein rak timh ciami a si ko tiah a chim.

“U Htin Kyaw nihhin president can ding hi aa ruah bal lo. President rian pek a rak si lioah hin Aung San Suu Kyi ai ah dirpiak chung deuh ding khin thla thum in thla ruk tiang hrawng lawng tuan a rak i timh”, tiah Daw Su Su Lwin nih a chim.

U Htin Kyaw nih a ruah ning ahcun thla thum in thla ruk karlak ahhin cun Aung San Suu Kyi president tuan khawhnak ding aa dawnkhantu Phunghrampi hi remh khawh a si cang lai tiah a ruah tiin Daw Su Su Lwin nih a chim chih.

Asinain, kum 2 chungah cu phunghrampi cu remh khawh a si ti lo. Cun, Daw Su Su Lwin nih cun “U Htin Kyaw nan duhsak i nan dirpi bantukin president tuan dingah U Win Myint hi nan cohlan ding le nan duhsak cio dingin kan forhfial hna”, tiah a chim.

Ref: The Irrawaddy