U.S.: Myanmar Ralkap Le North Korea Pehtlaihnak Vialte Chat Dih Cang Uh

Ralkap

NLD cozah nih North Korea he riantuantinak asiloah pehtlaihnak zeihmanh kan ngei lo tiah an ti ko nain Myanmar ralkap nih North Korea he pehtlaihnak an ngei peng rih.

Cucaah, US President Trump cozah nih Myanmar cozah cu North Korea he pehtlaihnak an ngeihmi vialte, a dihlak in chah ding le ngol ding cang dingin namchannak a tuah.

North Korea kong he pehtlai in US special lamkaltu cu Myanmar a tlawn lioah Myanmar ralkap le North Korea karlak pehtlaihnak dihdonghter dingin Washington lei in Aung San Suu Kyi le ralkap bawi lutlai Snr-Gen Min Aung Hlaing sinah bia an rawnh.

US Palai Joseph Yun cu Myanmar ram a tlawng i hi a tlawnnak in a hmuhtheih ning ahcun Myanmar ralkap le North Korea pehtlaihnak an ngeih peng rih ti theih a si caah US cu a lungre a thei.

 “Myanmar ralkap hi North Korea he pehtlaihnak an ngeih rih ti ka theih khawh i a tha ngaingai, hi kong he pehtlai in North Korea hi vawlei pumpi caah siseh, Asia ram chung caah siseh tihnung ral a si caah Myanmar cozah nih pehtlaihnak vialte hi an chah dih a herh”, tiah Joseph Yun nih a chim.

Joseph Yun nih cun North Korea le Myanmar karlak ah ralkap lei kong he pehtlai in zeibantuk pehtlaihnak asiloah riantuantinak an ngeih cu fianglang in a langhter duh lo.

Cun, hi kong he pehtlai in Washington i Myanmar Palai Zung zong nih zeihmanh chimrelmi a ngei ve lo.

Myanmar cozah nih cun hriamnam kong ah siseh, adang ralkap lei kong he pehtlai in siseh, North Korea he i pehtlaihnak cu 2011 lio Myanmar ram hruainak aa thlen hlan in ngol dih a si cang tiah an ti.

A hlan ahhin Myanmar ralkap nih North Korea sermi hriamnam pawl cawknak an tuah rak tuah i Myanmar ram chungah North Korea ralkap riantuantu an rak umter tiah a hlan i US cozah zung riantuan pahnih nih an chim.

A hlan lio Myanmar cozah zung riantuantu pakhat nih cun a hlan lio ralkap cozah he pehtlaihnak an rak ngeihmi pehpar in a dih kho rih lomi pehtlaihnak an ngeih rih i a si lai, North Korea le Myanmar ralkap pehtlaihnak ah nuclear kong hi aa tel lai lo tiah a chim.

US nih Myanmar cungah North Korea he pehtlaihnak an ngeihmi ruangah zeihmanh tuah ding ngai cu timhmi a um rih lo nain, “An i pehtlaihnak hi kan ram humhimnak caah a rem lomi a si ahcun Myanmar cungah phihkhamnak telh in thil tampi tuah ding a um ko”, tiah State Department in zungbawi pakhat nih a chim.

Atu ahhin cun, US nih ram khat le ram khat i chawnhbiaknak tein Myanmar cungah rian a tuan rih, asinain North Korea he pehtlaihnak vialte a chah dih lo ahcun Myanmar le US karlak pehtlaihnak hi pehzulh awk ah a har te kho.

Ref: Reuters