UN: Bangladesh Ah Rohingya Ralzaam 700,000 Leng An Phan Cang

Rohingya

August thla thih lai in atu tiangah Myanmar in Bangladesh ah a zaammi Rohingya cu 480,000 an phan cang i zohkhenh awk ah an har hringhran cang tiah nizaan ahkhan UN lei in chimrel khotu Stephane Dujarric nih Xinhua thawngzamhnak ah a chim.

“Office for the Coordination of Humanitarian Affiars (OCHA) nih August thla dih laite thawk in Bangladesh ah a zaammi Rohingya ralzaam cu 480,000 an phan cang tiah an chim”, tiah Stephane nih a chim.

A thar in a phan mi hna he fonh ahcun Bangladesh ram ah Rohingya ralzaam a ummi hi 700,000 leng an si cang tiah a chim chih.

UNHCR nih a thlahmi thil phur vanlawng pakhat zong Cawn Nihnihni zing ahkhan Dhaka ah a phan. Adang bawmhnak petu ding vanlawng pahnih zong a phan chap lai tiah Stephane nih a chim.

“Bawmhnak cu pek i zuam lengmang a si ko nain a minung an tam tuk tikah bawmhchanh awk cawk lei khi an si lo. An phan tharmi hna tampi cu zohkhenh hau taktak khi an si hna”.

“UNHCR le adang a tuanti hawi mi bawmchantu bu hna nih a phan tharmi hna cu Kutupalong le Nayapara camp ah zohkhenhnak le humhimnak an pek hna”, tiah Stephane nih a chim.

World Food Program nih zarh hnih dan ah cafang 25 kilo cio pek hna dingin minung 460,000 cu mincazin ah an khumh cang hna. Cun, World Health Organisation nih Bangladesh Health Ministry he hmun khat ah ngandamnak lei kong ah zohkhenhnak an pek hna tiah theih a si.

Ref: Bernama