UN Lutlai: Myanmar Nih Rohingya Ralzaam Hna Hi Rammi Sinak A Pek Hrimhrim Hna A Herh

Rammi

Cawn Nilini ahkhan Rohingya ralzaam vialte hna hi an umnak Rakhine Ramkulh chungah tlun/kirter than khawh an si nakhnga Myanmar nih rammi sinak a pek hrimhrim hna a herh tiah UN lutlai Filippo Grandi nih a chim.

 “Hi ralzaam hi rammi sinak ngei lo in an um peng ding a si kho hrimhrim lo, rammi sinak ngei lomi an sinak dirhmun ruangah thleidannak le namnehnak a tuarter khun hna. Hi hlan zong ah an rak tong peng”, tiah Filippo Grandi nih a chim.

Rohingya ralhrang nih tukdohnak an tuahmi cungah Myanmar ralkap nih lehnak an tuah ruangah Rohingya ralzaam 600,000 leng an phan.

 “Myanmar ah Rohingya ralzaam kirter thannak hi a tluan khawhnak dingah a buai ngaimi rammi sinak kong hi tuakkhan hmasa a herh. Hi kong hi tawlrel le onhnak a um hmasa lo ahcun kirter thannak hi a tluang kho lai lo”, tiah Filippo nih cun a chim chih.

 “Rohingya pawl hi Myanmar rammi ah cohlan an si lengah Rakhine Ramkulh caah sersiamnak an ngeih dingah cozah nih hnatlaknak an ngeih a herh fawn”.

“Buaibainak hi ngol a herh, taamhaalnak a tuarmi le innlo duahpiak a tongmi mi harsa hna caah bawmhnak a pemi riantuantu hna hi Rakhine chung luhchuahnak nawl pek an si a herh”, tiah Filippo nih a chim fawn.

Myanmar nawlngeitu hna le UN World Food Programme hna cu Rakhine chung eidin pek/chanhnak tuah thannak kong ah biaruahnak an ngei. Myanmar cozah nih UNHCR zong Rohingya pawl konglam ceihhmai dingah sawmnak an tuah cang i riantuannak a tluang deuh cang lai tiah ka zumh tiah Filippo nih a chim.

Ref: AFP