UN Security Council Nih Myanmar Kong Ceihhmainak An Tuah Lai

Security

A ra laimi Cawn Nilini khi UN Security Council nih Myanmar ram chung buaibainak kong ceihhmainak an ngei lai, cun hi buaibainak kong ah UN Secretary-General Antonio Guterres nih biachimnak a ngei lai tiah theih a si.

A liamcia zarh 4/5 chungah Myanmar in Bangladesh ah a zaammi Rohingya hi 430,000 leng an si cang tikah Britian, France, US le adang ram 4 nih Myanmar buaibainak kong ah meeting tuah dingin halnak an tuah.

Hi meeting hi UN Security Council ah a zungzal in chungtel a si lomi ram hna, Egypt, Kazakhstan, Senegal le Sweden zong nih tuah dingin an hal ve ti a si.

Cawn Nihnihni zong ah UN Security Council chungtel hna sinah Myanmar ram chung thil sining theihternak tuah a si.

Tu thla thawk ahkhan innka-khar meeting cu UN Security Council an rak tuah cang i Myanmar chung tukdohnak ngol a si nakhnga a rannak in karhlannak a um dingah an rak thanh cang.

September thla thawk ahkhan Guterres nih UN Security Council ah Myanmar ram chung buaibainak ruangah ramleng tiangin daihnak le humhimnak caah tihphannak a um kho i ralzaam hna harsatnak tam tuk a chuah kho tiah a lungretheihnak ca a rak tial.

Covo tanhtu riantuan phu hna nih Myanmar cozah cungah dantatnak/phihkhamnak tuah dingin UN Security Council sinah hneknak an tuah i ralkap lei pehtlaihnak a ngeimi ram vialte nih pehtlaihnak an ngeihmi chah dingin an hal len hna.

Ref: AFP