UN Security Council Nih Tukdohnak Ngol Dingin Myanmar An Hal

Tukdohnak

UN Secretary-General Antonio Guterres le UN Security Council nih Cawn Nithumni ahkhan Rohingya muslim pawl ralchan in tukdohnak ngol cang dingin Myanmar cozah sinah halnak an tuah.

Rakhine ramkulh chung thil sining zoh tikah Myanmar cozah nih miphun cihmihnak an tuah bak a si ko timi a lang, Bangladesh ah Rohingya 400,000 hrawng an zaam cang tiah Guterres nih a chim.

 “Rohingya milu 1.1 million chungah then thum-khen khat cu Myanmar in an chuak cang, miphun cihmihnak an tuah a si ti lengin adang hman awk biafang a um ti maw?”.

“Ram chungin a zaam cangmi hna vialte kir thannak nawl an hmuhnak hnga, phung zulhnak a umnak hnga, tukdohnak a dih nakhnga le ralkap cawlcanghnak ngol a si nakhnga Myanmar cozah sinah ka nawl ko hna”, tiah Guterres nih a chim.

Atu bantukin Myanmar ralkap nih August 25 i Rohingya tapung pawl tukdohnak tuahmi kong ah lehhruhnak an tuah tikah vawlei pumpi hmaiah Daw Aung San Suu Kyi caah thil har ngai a hung si.

Rohingya ralzaam pawl chim ning ahcun Myanmar in Rohingya pawl dawithawlnak an tuah ti a si i Myanmar cozah chimnak ah cun ‘ralhrang’ tukdohnak tuahmi a si ti a si ve.

Britain le Sweden nih Rohingya pawl buaibainak ruangah Myanmar kong ceih dingin an chuahpi caah Cawn Nithumni, nizaan ahkhan Myanmar kong cu UN Security Council ah ceih a si i Myanmar cu mawhchiat ngai a si.

UN Security Council nih cun Myanmar, Rakhine ramkulh chung buaibainak kong ah Myanmar cozah nih a rannak in tukdohnak a ngol dingin le rammi hna runvennak le ralzaam kong hi tha tein riantuannak a ngeih than ding hi a herh tiah thanhnak an tuah.

 “Rongingya kong hi ngaihchia tuk hringhran a si, bawmhchan herh taktak khi an si. Tampi an thi cuahmah i faak tuk in harnak an tuar, hi hi kan kham/doh a herh”, tiah Guterres nih a chim.

Cun, Malala Yousafzai le Muhammad Yunus telh in Noble Peace laksawng hmutu 12 hrawng nih UN Security Council ah Rohingya muslim pawl tukdohnak/dawithawlnak dihdonghter dingin a herhmi thil tuah dingah cakuat an tial.

Ref: Reuters