UNHCR Card Tlaih Myanmar 18 Telh In Ramdangmi 40 Leng Tlaihkhih An Tong

Tlaihkhihnak

KUALA LUMPUR: Cawn Nili zaan, sml 10:00 in zinglei 3:00 tiang Pudu hrawnghrang inn (flat) le Jalan Kia Peng i zaan nuamhnak hmun pakhat ah Immigration nih tlaihkhihnak an tuah i ramdangmi 45 tlaih an tong tiah theih a si.

Immigration Zung riantuantu hna cu ramdangmi pawl umnak inn hlanmi chungah le zaan nuamhnak hmun pakhat ah an lut i ramdangmi pawl cu an tlaih hna. Minung 189 hi check an si i hi chungah 45 hi tlaihkhih a tongmi an si.

 “Inn chungah tlaihmi hi minung 21 an si i adang pawl hi cu zaan nuamhnak hmun ah tlaihmi an si. Tlaihmi hna chungin a tam deuh (minung 24) cu UNHCR card aa tlaihmi an si”.

“Nu 5 telh in Myanmar minung 18 kan tlaih hna, cun India 1, Indonesia 1 le Pakistan pakhat kan tlaih hna”.

“A tam deuh cu innkhaan hlangmi an si hna. Cheukhat cu amah nawl in an innkhaan hna an dan hi hi DBKL phung an buar a si. Duh poah in innkhaan dal/dan zong a ngah lo. Inn ngeitu pawl zong hi DBKL nih dan an tat hna lai”, tiah Immigration Zung director-general Datuk Seri Mustafar nih a chim.

Zaan nuamhnak hmun ah tlaihmi hna cu minung 25 an si i 20 hi Thailand nu pawl an si, Uzbekistan nu 2, cun Bangladesh pa 2 an si tiah theih a si.

 “UNHCR card aa tlaihmi hna cu ralzaam taktak an si le si lo zohhlatnak le an konglam checknak kan tuah ta lai”.

“Ningcang lo riantuannak/zaan nuamhnak pawl le phungninglo ramdangmi hna konglam checknak kan tuahmi cu rianngeitu cozah zung dangdang ah theihternak kan tuah hna lai. Hi bantuk thil thurhnawm tuahnak phihkhamnak caah a herhmi kan tuah lai”, tiah Mustafar nih a chim fawn.

Pudu i inn (flat) ah tlaihkhihnak tuah lioah cun ramdang nu pakhat cu ‘Malaysia rammi ka si, nau ka pawi i sizung ah kal ka hau ee;’ tiah a phunphun in a hlen hna i innka hram ah a chang tup ti a si.

Asinain, Malaysia rammi na si ahcun ‘Negaraku’ timi Malaysia ram hlapi an sakter i a sa kho fawn, cun catlap zeihmanh tlaihmi a ngeih fawn lo caah a luat hlei lo i tlaih thiamthiam a si ve.

Hi tlaihkhihnak cu pawngkam mipi hna nih duhlonak bia an chim lengmang caah tuah a si i Kuala Lumpur Immigration Zung le DBKL fonh in tuah a si tiah theih a si.

Ref: The Star/NST